“Minishengeni minon dialogun Prishtinë-Beograd, i krijohet hapësirë Serbisë”

Ish-ministri i Bujqësisë, Edmond Panariti ka reaguar në lidhje me ‘Minishengenin Ballkanik’, ku thekson se Shqipëria është bërë pjesë e një garniture të panevojshme.

Në një intervistë për Report Tv, ai është shprehur se ky ‘Minishengen’ minon dialogun Prishtinë-Beograd duke i krijuar hapësirë Serbisë.

Më tutje, ai thekson se në të gjitha pikat e marrëveshjes ka mungese transparence, si dhe çdo lëvizje e Shqipërisë pro kësaj marrëveshje është e rrezikshme.

Panariti tha:

Dalja e këtij propozimi në këtë moment dëmton rëndë dialogun Prishtinë-Beograd, dhe i krijon një hapësirë Serbisë e cila nuk është për dialog mes dy vendeve. Ne bëhemi pjesë e një garniture të panevojshme. Ka një mungesë transparence të plotë për pikat e marrëveshjes. Një qeveri e përgjegjshme, për nisma të tilla duhet të pyesë edhe parlamentin shqiptar, forcat politike. Vizita e parë që Rama duhet të bënte do duhet të ishte në Kosovë për të marrë mendimin e tyre për të planifikuar më pas veprimin e radhës. Çdo lëvizje e Shqipërisë pro kësaj marrëveshje është e rrezikshme. Kostoja e parë është për Kosovën. Serbia tashmë ka vendosur vijën e kuqe dhe nuk e njeh Kosovën duke vendosur bllokada në të gjitha nivelet. Unë mendoj që hapja e lojës në mënyrë të panevojshme nuk duhet të bëhen. Kosova nuk mund të ishte prezent, sepse nismëtarja e kësaj nisme, Serbia, nuk e njeh atë. Veprimi i Kosovës është i menduar, ndërsa i Shqipërisë është naiv, dhe i pakonsultuar.
Sa i takon gjuhës së kryeministrit, Panariti ka dy fjalë.

Ai tha:

Gjuha e kryeministrit ishte e rëndë. Në vend që të shkojmë në krah të qëndrimit dinjitoz të Kosovës, krijojmë pole që e pengojnë dhe që janë pjesë e një strategjie të mirë menduar dhe i shërbejnë vendeve për qëllimet e tyre politike. Ky proces duhet të ngrijë. Këto janë çështje delikate. Unë prisja të krijohej një debat mes forcave politike, pasi ky proces duhej analizuar për përfitimet dhe kostot.