Më shumë se 4 orë diskutime, mbyllet takimi i kryeministrit Rama me krerët e bashkive në Kuç të Vlorës!

Pas më shumë se katër orësh diskutime është mbyllur takimi i Kryeministrit Edi Rama me kryetarët e bashkive, sot në Kuç të Vlorës (12 gusht).

Gjatë mbledhjes, kryetarët e bashkive kanë paraqitur problematikat dhe sfidat me të cilat përballen njësitë vendore, ndërsa mësohet se është diskutuar edhe mbi mënyrën e organizimit territorial dhe përmirësimin e shërbimeve ndaj qytetarëve.

PS ka propozuar një reformë territoriale ku shkrihen 15 bashki të vogla, të cilat kundërshtojnë projektin. Mbledhja nisi pak pas orës 14:00.

Reforma territoriale, ecuria e saj ndër vite dhe nevoja për një administrim më efikas të bashkive ishin ndër çështjet kryesore të trajtuara gjatë takimit.

Raportohet se në takim morën pjesë rreth 20 kryetarë bashkish, mes tyre ata që përfaqësojnë Durrësin, Shkodrën, Elbasanin, Korçën, Beratin, Vlorën, Gjirokastrën, Klosin, Rrogozhinën, Dimalin dhe bashki të tjera të vogla, të cilat kanë kundërshtuar planet për shkrirjen e tyre.