Këshilltari i Presidentit pyet Kurtin: A kanë vlerë Rambujeja e Vjena që u nënshkruan nën presionin amerikan?
Zyra e Presidentit të Kosovës ka nisur të marrë rolin e opozitarit në raport me Qeverinë. Kanë nisur të kundërshtojnë çdo veprim të Kryeministrit.
Madje, sot, zyrtarë të Presidencës – e funksionon si ruajtëse e unitetit të popullit – e kanë kundërshtuar idenë e Albin Kurtit se marrëveshjet që arrihen me presion s’kanë kurrfarë vlere.
Artan Behrami, Këshilltar i Presidentit Thaçi, ka thënë se gjithë marrëveshjet e arritura ndërmjet Kosovës dhe Serbisë dhe përgjithësisht në Ballkan janë të realizuara duke përdorur presionin, forcën dhe kërcënimin.
“Pjesëmarrësit në negociatat e Rambujesë për shembull flasin për “negociata torturuese dhe presion të madh psikologjik”, që ambasadori Richard Holbrooke dhe sekretarja Madeleine Albright kishin përdorur mbi shqiptarët dhe serbët. Pikërisht ai presion dhe ato kërcënime shporrën regjimin e Millosheviqit dhe Kosovës i sollën lirinë dhe çlirimin”, ka kujtuar Behrami.
Ai ka thënë se bazuar në teorinë e Kurtit asnjëra prej marrëveshjeve të arritura nën presion ku ka fituar Kosova s’kanë kurrfarë vlere.
“Gjatë negociatave për statusin e Kosovës, deri në shpalljen e pavarësisë, ka pasur kërcënime, presione dhe rezistencë për të pranuar pakon e Ahtisaarit, e cila e solli pavarësinë e Kosovës”, ka shtuar ai.
Gjithë presioni mbi Kosovë dhe Serbi po e bën i deleguari special i Donald Trump, RIchard Grenell.
Zyrtari i Presidencës ka thënë se ka ngjashmëri ndërmjet Grenellit dhe Ruchard Holbroke, i cili kishte ndërmjetësuar dikur edhe në luftën Kosovë-Serbi.
“Atë që është duke e bërë sot ambasadori Grenell është pikërisht ajo që e kishte bërë edhe Holbrooke më 1999 në Rambuje. As më pak dhe as më shumë, vetëm koha, konteksti dhe gjeopolitika janë më ndryshe. Mjetet janë të njëjta! Atë që po dëshiron të bëjë presidenti Trump është pikërisht e njëjtë me atë që bëri Clinton më 1999 dhe Bush më 2007”, ka shkruar Behrami.
Sipas ish-gazetarit tash konteksti politik ka ndryshuar në Kosovë. Liderët aktualë s’po i besojnë Amerikës.
“Por, ajo çfarë ka ndryshuar është që disa nga liderët e tashëm të Kosovës nuk e kanë guximin e liderëve të atëhershëm për t’ia besuar këtë proces Amerikës, që rezultatet tashmë janë të dëshmuara në dy dekadat e fundit!”, ka shtuar ai.
Donald Trump po kërkon një marrëveshje të shpejt ndërmjet Kosovës dhe Serbisë. Vitin e kaluar kishte kërkuar që marrëveshje të ishte e pranueshme për të dy palët.
Mirëpo, bisedimet ende s’kanë rifilluar pasi Kosova ende vazhdon ta mbajë në fuqi taksën ndaj produkteve serbe e boshnjake.
Richard Grenell, i Deleguar Special i Donald Trump për dialogun Kosovë-Serbi, është përfshirë në një debat me Kryeministrin Albin Kurtin për heqjen e taksës. Grenell po kërcënon me masa ekonomike ndaj Kosovës nëse udhëheqësit kosovarë vazhdojnë të mos përfillin kërkesat amerikane.
Albin Kurti ka premtuar se nga 1 prilli do ta largojë taksën 100 për qind kurse nga 15 marsi vetëm për lëndën e parë.
Në një editorial për një gazetë gjermane, Kurti tha se çdo marrëveshje që arrihet me presion s’do të ketë ndonjë vlerë.
Kosova dhe Serbia kanë hyrë në një dialog të ri prej vitit 2011, pasi Gjykata Ndërkombëtare e Drejtësisë tha se shpallja e shtetit kosovar s’ishte në kundërshtim me të drejtën ndërkombëtare. Janë zhvilluar disa raunde bisedimesh në Bruksel mirëpo s’ka pasur një marrëveshje finale.
Tash, edhe SHBA, por edhe BE kanë kërkuar një Marrëveshje Finale që do të normalizonte raportet ndërmjet Kosovës dhe Serbisë.