BERZH ka miratuar strategjinë e re për Shqipërinë

Bordi i Drejtorëve i BERZH-it ka miratuar strategjinë e re për Shqipërinë, e cila përcakton kuadrin e punës së Bankës në vend për periudhën 2020-2025. Sipa businessmag, dokumenti, i këshilluar me autoritetet dhe publikun e gjerë në Shqipëri, identifikon prioritetet e BERZH-it si investitor dhe si partner në angazhimet e politikave në vitet në vijim.

Banka vijon ta konsiderojë dhe ta mbështesë përafrimin gjithëpërfshirës me BE-në si shtysën kryesore të jashtme për reformat në vend, duke përfshirë forcimin e mirëqeverisjes dhe sundimit të ligjit. BERZH është një bankë shumëpalëshe që promovon zhvillimin e sektorit privat dhe nismat sipërmarrëse në 38 ekonomi në tre kontinente.

Banka është në pronësinë e 67 vendeve si dhe të BE-së dhe EIB-së. Investimet e BERZH-it kanë si qëllim që ekonomitë në rajonin e vet të bëhen konkurruese, përfshirëse, të mirë qeverisura, të gjelbra, dhe të integruara. Deri tani, BERZH ka investuar mbi 1,4 miliard Euro në 97 projekte në Shqipëri.