Vrasja e ish-ushtarakut Johan Zuko, hetimet e Policisë: Sherri ndodhi mes disa personave, përshkallëzoi në përdorim arme! Po ndjekim autorin
Policia e Korçës ka ndarë detaje të tjera nga dinamika e krimit të rëndë të ndodhur pasditen e sotme në lagjen nr. 14 të Korçës, ku pas një konflikti mbeti i vrarë me armë zjarri “Kallashnikov” Johan Zuko, 20 vjeç, ushtarak i Forcave të Armatosura dhe ish-futbollist i akademisë së Skënderbeut.
Mësohet se në sherr nuk kanë qenë të përfshirë vetëm dy shokët, viktima dhe autori, por edhe persona të tjerë.
Ngjarja ka ndodhur rreth orës 16:30. Konflikti nisi në lagjen nr. 15 dhe përfundoi në lagjen nr. 14, pranë shtëpisë së viktimës Zuko. Ky i fundit vrapoi për të shpëtuar dhe fshehur, por autori me kallash në dorë e gjeti dhe e vrau pranë banesës.
“Rreth orës 16:30, në lagjen nr. 15, në rrugën “Viktor Eftimiu”, Korçë, ka ndodhur një konflikt ndërmjet disa personave, i cili është përshkallëzuar në përdorimin e armës së zjarrit. Si pasojë e të shtënave, ka humbur jetën shtetasi J. Z., rreth 20 vjeç, banues në lagjen nr. 14, Korçë”, njoftoi policia vendore.
Autori i krimit është identifikuar dhe u sekuestruan pamjet e kamerave të sigurisë në zonë.
“Si rezultat i veprimeve të shpejta hetimore dhe operative të kryera nga shërbimet e Policisë në vendngjarje, është bërë i mundur identifikimi i autorit të dyshuar, i cili është larguar nga vendngjarja menjëherë pas krimit”, sqaron policia.
Tre persona janë shoqëruar deri tani.
“Ndërkohë, shërbimet e Policisë kanë shoqëruar në Komisariat, për veprime të mëtejshme procedurale, tre shtetas të dyshuar si të përfshirë në konfliktin ku humbi jetën 20-vjeçari”, theksohet nga policia vendore.
Motivet e krimit mbeten ende të panjohura.
Njoftimi i Policisë Korçë:
“Rreth orës 16:30, në lagjen nr. 15, në rrugën “Viktor Eftimiu”, Korçë, ka ndodhur një konflikt ndërmjet disa personave, i cili është përshkallëzuar në përdorimin e armës së zjarrit. Si pasojë e të shtënave, ka humbur jetën shtetasi J. Z., rreth 20 vjeç, banues në lagjen nr. 14, Korçë.
Si rezultat i veprimeve të shpejta hetimore dhe operative të kryera nga shërbimet e Policisë në vendngjarje, është bërë i mundur identifikimi i autorit të dyshuar, i cili është larguar nga vendngjarja menjëherë pas krimit.
Shërbimet e Policisë janë vënë në ndjekje të tij, kanë rrethuar zonën dhe vijojnë kontrollet intensive për lokalizimin dhe kapjen e autorit të dyshuar.
Ndërkohë, shërbimet e Policisë kanë shoqëruar në Komisariat, për veprime të mëtejshme procedurale, tre shtetas të dyshuar si të përfshirë në konfliktin ku humbi jetën 20-vjeçari.
Grupi hetimor, nën drejtimin e Prokurorisë, vijon veprimet në vendngjarje për sqarimin e plotë të rrethanave të ngjarjes, dokumentimin ligjor të saj, si dhe identifikimin e të gjithë personave të përfshirë”.