Kriza politike në Kosovë, Kurti dhe Abdixhiku takohen përsëri për Presidentin: Të shmangim zgjedhjet e reja!

Kryeministri në detyrë i Kosovës dhe kreu i Lëvizjes Vetëvendosje, Albin Kurti, ka mbërritur në Kuvendin e Kosovës për takimin me kryetarin e Lidhjes Demokratike të Kosovës, Lumir Abdixhiku, në kuadër të përpjekjeve për arritjen e një marrëveshjeje për zgjedhjen e presidentit të ri.

Kurti u shpreh optimist për mundësinë e një marrëveshjeje, duke theksuar se diskutimet me LDK-në po zhvillohen me vullnet të mirë dhe me synimin për të shmangur zgjedhjet e reja.

“Po i vazhdojmë diskutimet me vullnet të mirë, ashtu siç jemi marrë vesh, në mënyrë që vendit t’ia sjellim presidentin ose presidenten e re dhe t’i evitojmë zgjedhjet e reja”, deklaroi Kurti para gazetarëve.

Ai theksoi se palët duhet të ruajnë konfidencialitetin gjatë negociatave, duke nënvizuar se Vetëvendosje mbetet e hapur për diskutime deri në arritjen e një marrëveshjeje.

“Unë gjithmonë pres më të mirën, prandaj edhe me vullnet të mirë po shkojmë në mbledhje sot”, u shpreh Kurti.

Ndërkohë, ministri i Jashtëm në detyrë, Glauk Konjufca, ka deklaruar se Vetëvendosje i ka përcaktuar tashmë emrat që mund të propozojë për postin e presidentit, por nuk ka bërë të ditur identitetet e tyre.

“Lëvizja Vetëvendosje është gati. Kryeministri Kurti është gati. Emrat i kemi, por nuk mund t’i ndaj këtu me ju, sepse pastaj do ta humbte kuptimin procesi i negociimit”, tha Konjufca.

Takimi mes Kurtit dhe Abdixhikut shihet si një përpjekje për të gjetur një zgjidhje politike dhe për të shmangur një tjetër proces zgjedhor në Kosovë.