SHBA vendos tarifa të reja ndaj 60 partnerëve tregtarë, Trump: Nuk kanë parandaluar punën e detyruar

Shtetet e Bashkuara kanë vendosur tarifa të reja ndaj 60 partnerëve të tyre kryesorë tregtarë, duke argumentuar se shumë prej tyre nuk kanë ndërmarrë masa të mjaftueshme për të parandaluar importin e mallrave të prodhuara me punë të detyruar.

Tarifat, që variojnë nga 10% në 12.5%, hynë në fuqi këtë të premte dhe prekin vende që përfaqësojnë rreth 99.4% të importeve amerikane, përfshirë Bashkimin Evropian, Kinën, Mbretërinë e Bashkuar, Kanadanë, Japoninë dhe Indinë.

Administrata e presidentit Donald Trump e justifikon vendimin si pjesë të politikës së saj për mbrojtjen e të drejtave të punëtorëve dhe luftën kundër praktikave të padrejta tregtare.

Përfaqësuesi amerikan për Tregtinë, Jamieson Greer, deklaroi se masat synojnë të korrigjojnë një praktikë që, sipas tij, dëmton konkurrencën dhe cenon të drejtat e njeriut.

“Veprimi i sotëm do të ndihmojë në luftën kundër punës së detyruar dhe do të përmirësojë mirëqenien e punëtorëve në mbarë botën”, u shpreh Greer.

Sipas autoriteteve amerikane, vendet që kanë marrë angazhime konkrete për të ndaluar importin e produkteve të lidhura me punën e detyruar do t’i nënshtrohen një tarife prej 10%, ndërsa ato që nuk kanë ndërmarrë hapa të tillë do të përballen me tarifën më të lartë prej 12.5%.

Vendimi ka shkaktuar reagime të menjëhershme nga disa prej vendeve të prekura.

Qeveria braziliane e cilësoi masën “arbitrare” dhe “të pajustifikuar”, duke akuzuar Uashingtonin se po përdor çështjen e të drejtave të punëtorëve për të favorizuar prodhuesit vendas.

Edhe Japonia shprehu keqardhje për tarifat e reja, duke theksuar se tregtia e saj zhvillohet në përputhje me rregullat ndërkombëtare, ndërsa Australia i konsideroi masat “plotësisht të pajustifikuara” dhe kërkoi heqjen e tyre.

Nga ana tjetër, Kina hodhi poshtë akuzat për përdorimin e punës së detyruar, duke deklaruar se nuk ekziston një praktikë e tillë dhe se Uashingtoni po e përdor këtë argument për qëllime politike.