Greqi, ekstremistët e djathtë bëjnë thirrje për “çlirimin” e Epirit të Veriut

Lideri i partisë radikale të djathtë, që për herë të parë ka siguruar hyrjen në parlament, ka shprehur hapur synimet për Epirin e Veriut. Kryetari i Golden Dawn, Nikolaos Michaloliakos, përveç thirrjes për “çlirimin” e Epirit të Veriut, ka kërkuar edhe atë që ai e quan “pastrimin” e vendit, që duhet të vijë me largimin e emigrantëve ilegalë.

“Ne do të luftojmë për vendin tonë. Ne nuk i marrim parasysh sakrificat. Ai që nuk është me ne është kundër nesh. Ne nuk tërhiqemi”, është shprehur Michaloliakos. “Askush nuk mund t’i ndalojë 100 anëtarët e Golden Dawn dhe nëse ata sjellin tanket, ata duhet ta dinë se (ushtria greke) do të jetë me ne”.

Në Greqi, përllogaritet se jetojnë 1 milion emigrantë të huaj të cilët ndihen të kërcënuar nga partia neo-naziste. Kjo parti mbështet edhe minimin e kufirit për parandalimin e hyrjes së emigrantëve ilegalë në vend.

Godlen Dawn në zgjedhjet e së dielës fitoi 21 vende nga 300 që ka parlamenti grek pasi arriti të marrë afërsisht 7% të votave në total. Në zgjedhjet e kaluara, të cilat u mbajtën në vitin 2009, kjo parti kishte vetëm 0.3% elektorat.

Një rezultat i tillë erdhi për shkak të qëndrimit të tyre kundër ndihmës nga jashtë dhe ka bërë thirrje për bashkimin e Greqisë me Qipron, gjë e cila u provua nga regjimi ushtarak në vitin 1974 që solli ndërhyrjen e Turqisë në ishull. Që prej atëherë Qipro vazhdon të jetë e ndarë. Gjatë fushatë ata kanë djegur flamurin amerikan dhe atë izraelit.

Rezultati i zgjedhjeve në Greqi solli një shpërndarje të gjerë të votave, çka po vështirëson krijimin e një koalicioni qeverisës.

Kreu i Demokracisë së Re, Antonis Samaras, partia e të cilët doli e para me përqindje votash, dorëzojë mandatin për formimin e koalicionit qeverisës pas dështimit të negociatave. Tashmë e drejta për të formuar qeverinë i është dhënë Aleksis Tsipras, që udhëheqë koalicionin e radikalëve të majtë.

Nëse ai dhe Venizelos i PASOK, dështojnë në formimin e qeverisë dhe nëse presidenti Karlos Papulias nuk do të jetë në gjendje të formojë një qeveri të unitetit kombëtar, atëherë ai mund të thërrasë zgjedhje të reja brenda një muaji.