Nuk ka gaz për Shqipërinë, TAP nuk mund të shfrytëzohet

Gazi që do të kalojë nga Azerbajxhani në Shqipëri e më pas në Europë përmes gazsjellësit TAP nuk do të mund të shfrytëzohet menjëherë nga vendi ynë. Qeveria ka miratuar një strategji për ngritjen e një rrjeti vendas të shpërndarjes, por kjo kërkon kohë si dhe rreth 300 milionë euro fonde.Me kalimin e gazsjellësit TAP në vendin tonë, Shqipëria bëhet pjesë e rrjetit europian të gazit natyror, por kjo nuk do të thotë se ky burim energjie mund të përdoret menjëherë për nevojat e vendit. Flitet për një periudhë afatmesme, por që edhe ky objektiv është i largët.Në planin e qeverisë për zhvillimin e sektorit të gazit natyror në Shqipëri dhe identifikimin e projekteve prioritare, nënvizohet fakti se shpërndarja e gazit natyror brenda vendit nuk pritet të ndodhë përpara vitit 2020.Në të vërtetë, as fondet dhe as mënyra e ngritjes së rrjetit të gazit në Shqipëri nuk janë siguruar.Qeveria ka parashikuar ndërtimin e tre linjave kryesore të transmetimit. Koha e ndërtimit shkon deri në tre vjet, dhe shuma që kërkohet është 185 milionë euro.Ndërsa për shpërndarjen duhen edhe 110 milionë euro të tjera. Për momentin është ngritur si njësi vetëm kompania publike që do merret me administrimin e rrjetit të gazit.Në letër përfituesit e parë duhet të jenë sektorët e industrisë, më konkretisht TEC i Vlorës, por edhe ky kërkon një investim serioz për përshtatjen e teknologjisë nga përdorimi i naftës tek përdorimi i gazit natyror./ZgjohuShqiptar.info