Kina nuk e njeh Kosovën, por i jep viza

Kosovarët mund të udhëtojnë drejt Kinës me pasaportë. Ky shtet anëtar i Këshillit të Sigurimit në OKB-së, i cili nuk e ka njohur pavarësinë e Kosovës, po i lejon shtetasit e saj të hyjnë në territorin e vet duke u dhënë viza, sikurse bëjnë edhe disa shtete europiane. Zëvendësministri Petrit Selimi shpreson se ky është një hap drejt normalizimit të marrëdhënieve mes Prishtinës dhe Pekinit.

Nga Kina e largët po vijnë lajme të mira për kosovarët. Ky shtet anëtar permanent i Këshillit të Sigurimit të Organizatës së Kombeve të Bashkuara, pavarësisht qëndrimit refuzues ndaj pavarësisë së Kosovës, duket se ka vendosur të lehtësojë udhëtimin e kosovarëve duke u lëshuar viza.

Kina, e cila ka rritjen më dinamike ekonomike në dekadat e fundit dhe që është ndër partnerët kryesorë tregtarë të Kosovës për nga importi, jo zyrtarisht ka filluar ta zbusë qëndrimin duke pranuar pasaportat kosovare si dokumente të vlefshme.