DASH mesazh Shqipërisë pas dëbimit të dy diplomatëve të Iranit

Zëdhënësja e Departamentit Amerikan të Shtetit, Morgan Ortagus, ka reaguar për dëbimin e diplomatëve iranianë nga Shqipëria. Në një postim në mediat sociale, Ortagus shprehet se është një vendim për t’u lavdëruar i Shqipërisë.

Këtë të mërkurë qeveria shqiptare njoftoi për dëbimin e dy zyrtarëve iranianë, shtetasit Seyed Ahmed Hosseini Alast dhe Mohamed Peimanemati.

Këta dy diplomatë kishin qenë bashkëpunëtorë të gjeneralit të vrarë iranian Qassem Suleimani.

“Ne e lavdërojmë vendimin e qeverisë së Shqipërisë për të dëbuar dy të ashtuquajturit diplomatë të Iranit. Regjimi iranian vazhdon të përdorë objektet e tij diplomatike në Evropë dhe gjetkë si mbulesë për të komplotuar sulme terroriste, si dhe për të kërcënuar dhe spiunuar iranianët që jetojnë jashtë”, shkruan Morgan Ortagus.