Politikani më i paguar në botë rrit edhe më shumë pagën: Do ta jap për bamirësi

Është politikani më i paguar në botë. Por kjo nuk mjafton. Ai do ta rrisë edhe më tej pagën e tij vjetore me 1.1 milionë dollarë. Bëhet fjalë për Lawrence Wong, kryeministrin e Singaporit.

Qeveria e vendit aziatik ka njoftuar se do të rrisë pagat vjetore të ministrave dhe zyrtarëve të tjerë, përfshirë edhe kryeministrin.

Dhe nuk është se paga e tij ishte e ulët, pasi të ardhurat e liderit të Singaporit janë shumë më të larta se ato të Giorgia Melonit, Emmanuel Macronit apo Donald Trumpit.

Renditja e pagave

Lawrence Wong do të përfitojë një rritje prej 1.4 milionë dollarësh singaporianë, të barabartë me rreth 1.1 milionë dollarë amerikanë ose 947 mijë euro, në pagën e tij vjetore.

Politikani, sipas BBC-së, ka deklaruar se do ta dhurojë këtë rritje për bamirësi gjatë pesë viteve të ardhshme.

Aktualisht, Wong merr rreth 2.2 milionë dollarë singaporianë në vit. Pas rritjes, paga e tij do të arrijë në 3.6 milionë dollarë singaporianë, një rritje prej më shumë se 60 për qind.

Në vendin e dytë në renditjen e politikanëve më të paguar është shefi ekzekutiv i Hong Kongut, John Lee, me rreth 719 mijë dollarë në vit. Pas tij renditet presidenti i Zvicrës, Guy Parmelin, me rreth 606 mijë dollarë.

Presidenti i Shteteve të Bashkuara, Donald Trump, merr 400 mijë dollarë në vit, ndërsa kryeministri britanik rreth 230 mijë dollarë.

Sa i përket kryeministres italiane Giorgia Meloni, paga që i takon si kryeministre është rreth 114.800 euro bruto në vit, që përkthehet në rreth 80 mijë euro neto, ose afërsisht 6.700 euro në muaj.

Megjithatë, Meloni ka zgjedhur të heqë dorë nga kjo pagë, gjë që e ka deklaruar në një dokument për transparencën e pagave, dhe të marrë në vend të saj indemnitetin si deputete, i cili është më i lartë, rreth 150 mijë euro neto në vit.

Ndërkohë, presidenti francez Emmanuel Macron merr rreth 192.468 euro në vit, ose rreth 16.039 euro në muaj.

Pse po rriten pagat?

Arsyeja e rritjes së madhe të pagave për Wong dhe përfaqësuesit e tjerë të qeverisë është, sipas kryeministrit, e qartë: pagat më të larta janë të nevojshme për të tërhequr njerëzit më të talentuar në drejtimin e vendit.

Por nuk është vetëm çështje talenti. Sipas argumentit të qeverisë së Singaporit, pagat e larta për ministrat mund të ndihmojnë edhe në frenimin e korrupsionit.

Megjithatë, pavarësisht këtyre argumenteve dhe vendimit të Wong për ta dhuruar rritjen e tij për bamirësi, vendimi ka shkaktuar kritika në Singapor.

Në vend ekziston një shqetësim i madh në mesin e klasës së mesme për sigurinë e vendeve të punës dhe rritjen e kostos së jetesës.