Sulm me shpatë në një shkollë në Suedi, plagosen disa persona –

Last Updated: 21/08/26 - 18:08
Sulm me shpatë në një shkollë në Suedi, plagosen disa persona –

Një sulmues i armatosur me shpatë ka hyrë në shkollën e mesme Brinellskolan, në Fagersta të Suedisë, duke plagosur rreth 3 persona. Autoritetet lokale konfirmuan se sulmuesi është ndaluar nga policia.

Sipas mediave lokale, i dyshuari dyshohet se ishte i armatosur me një hanxhar dhe u qëllua në këmbë nga efektivët e policisë.

“Një sulmues i armatosur me shpatë ka hyrë në Brinellskolan dhe ka plagosur disa persona”, njoftoi Bashkia e Fagerstas, duke bërë thirrje për respektimin e perimetrit të sigurisë dhe udhëzimeve të policisë.

“Dy persona janë plagosur rëndë dhe një i tretë po dërgohet në spital”,  tha për AFP kreu i shërbimeve shëndetësore për qarkun e Västmanland .

Policia vijon kontrollet në ambientet e shkollës, ndërsa disa institucione arsimore pranë saj janë vendosur në bllokim si masë paraprake.

Sipas transmetuesit publik suedez SVT, në zonën përreth shkollës është mobilizuar një prani e madhe emergjente, me ambulanca, automjete policie dhe një helikopter.

Ngjarja ka ndodhur në Fagersta, një qytet me rreth 12 mijë banorë në Suedinë qendrore.

Sulmet e mëparshme në shkollat suedeze

Suedia është përballur me disa sulme të rënda në institucione arsimore gjatë viteve të fundit.

Në shkurt të vitit 2025, një 35-vjeçar vrau 10 persona në një qendër edukimi për të rritur në Örebro, në sulmin më vdekjeprurës të këtij lloji në historinë moderne të vendit.

Në mars 2022, një 18-vjeçar sulmoi një shkollë të mesme në Malmö, duke vrarë dy mësues me thikë.

Ndërsa në tetor 2015, një sulmues i armatosur me shpatë vrau tre persona në një shkollë në Trollhättan, në një ngjarje të cilësuar si të motivuar nga racizmi. Sulmuesi u qëllua për vdekje nga policia.

Last Updated: 21/08/26 - 18:08
Back to top button
LAJMET E FUNDIT