Historia e plehrave “Made in Albania” vazhdon, Kroacia përçon alarmin

Gazeta kroate “The Dubrovnik Times” ka botuar më 15 mars 2018 një shkrim të Mark Thomas, ku flitet për mbeturinat plastike që vijnë nga Shqipëria, e që kanë ndotur Gadishullin e Peljesacit në rivierën dalmate.
Bëhet fjalë për një nga vendet e bregdetit kroat, i cili siç shihet nga fotot e botuara nga mediat vendase, është ndotur nga qese plastike, ambalazhe me mbishkrime shqiptare dhe mbeturina të tjera, shkruan Javanews.

Historia e plehrave “Made in Albania” nuk është e re. Ato emigrojnë nga bredgeti shqiptar, kryesisht nga grykëderdhja e lumenjve të Veriut të Shqipërisë, drejt brigjeve të Malit të Zi e Kroacisë. Edhe më përpara është shkruar e folur për shishet e birrës dhe kanoçet me mbishkrime shqiptare, të cilat pushtonin plazhet e fqinjëve veriorë, duke shqetësuar autoritetet për dëmtimin e sezoneve turistike të vendeve të prekura.
Shkrimi i gazetës kroate mbyllet duke thënë se imazhet e plehrave në bregdet janë shpërndarë kryesisht në rrjetet sociale, duke përfshirë edhe llogarinë e një aktivisti shqiptar të mjedisit, i cili i ka postuar nën diçiturën “Kroaci, na fal”!/ZgjohuShqiptar.info