Kaos në Irlandën e Veriut pas sulmit me thikë, digjen shtëpi e makina
Dhjetëra persona janë detyruar të largohen nga banesat e tyre në Belfast të Irlandës së Veriut, pas një sulmi me thikë që ndodhi të hënën, 8 qershor, në veri të qytetit.
Ky sulm, u pasua me një sërë incidentesh… Siç raportojnë mediat e huaja, janë djegur shtëpi dhe automjete, ndërsa i gjithë transporti publik në Belfast u pezullua përkohësisht për arsye sigurie.
Një video e shpërndarë gjerësisht në rrjetet sociale tregon disa persona, mes tyre edhe një individ që mbante një shkop, duke u përballur me autorin e dyshuar deri në mbërritjen e policisë.
Trazira në disa zona të Irlandës së Veriut
Policia e Irlandës së Veriut ka bërë thirrje për qetësi, pasi pas sulmit kanë shpërthyer incidente të dhunshme në disa qytete dhe zona të vendit. Tubime dhe protesta u mbajtën në Belfast, Londonderry, Antrim, Newtownabbey, Ballymena dhe Bangor.
Ndërsa disa protesta kaluan pa incidente, në zona të tjera situata u përshkallëzua në dhunë.
Në rrugën Newtownards, rreth 100 persona të maskuar u përfshinë në vandalizëm dhe sulme ndaj pronave. Sipas kreut të Partisë Unioniste të Ulsterit (UUP), Jon Burrows, një pjesë e madhe e tyre ishin adoleshentë.
Gjatë natës u dogjën kazanë mbeturinash dhe një autobus i transportit publik. Kompania e transportit Translink dënoi sulmin ndaj autobusit dhe njoftoi pezullimin e përkohshëm të shërbimeve.
Autoritetet dënojnë dhunën
Ministrja e Drejtësisë, Naomi Long, deklaroi se në Irlandën e Veriut nuk ka vend për “huliganë të maskuar”.
“Edhe pse e kuptoj shqetësimin e qytetarëve pas sulmit në veri të Belfastit, nuk mund të lejojmë që urrejtja të triumfojë”, tha ajo.
Ndërkohë, Zëvendësshefi i Policisë, Ryan Henderson, u bëri thirrje figurave me ndikim në komunitet që të nxisin protesta paqësore dhe të dekurajojnë çdo formë dhune.
Shërbimi i Zjarrfikësve dhe Shpëtimit të Irlandës së Veriut raportoi se vetëm gjatë mbrëmjes të së martës, 9 qershor, iu përgjigj 62 incidenteve. Shumica e tyre ndodhën në zonën e Belfastit, duke bërë të nevojshme angazhimin e 21 mjeteve shtesë zjarrfikëse nga pjesë të tjera të vendit.
Shefi i Policisë, Jon Boutcher, njoftoi se prania policore do të shtohet në ditët në vijim.
Sulme ndaj banorëve dhe bizneseve
Në zona të ndryshme u raportuan sulme ndaj pronave private. Në Crumlin Road u sulmua një automjet i policisë, ndërsa pranë tij u dogjën shtëpi dhe makina.
Një pastor lokal, Jack McKee, i cili po ndihmonte familjet e prekura, tha se disa anëtarë të komunitetit të tij, që jetojnë në zonë prej më shumë se 20 vitesh, po detyrohen të largohen nga shtëpitë e tyre “vetëm sepse janë me ngjyrë”.
“Jam i zemëruar dhe i zhgënjyer që po shohim një reagim të tillë në komunitetin tonë”, deklaroi ai.
Në lagjen Sandy Row të Belfastit shpërtheu gjithashtu një zjarr në një objekt tregtar. Dy automjete u dogjën në Newtownabbey, ndërsa në Portadown iu vu flaka një makine policie.
Në Ballyclare të County Antrim u sulmua edhe një berberhane në pronësi të shtetasve turq.
Sekretari britanik për Irlandën e Veriut, Hilary Benn, deklaroi se “nuk ka asnjë justifikim për këtë lloj shkatërrimi”.
Po kush është autori i dyshuar i sulmit?
Fillimisht, policia njoftoi se i dyshuari ishte me origjinë somaleze, por më vonë sqaroi se ai është shtetas sudanez.
Në vendngjarje u sekuestrua një thikë kuzhine, e cila dyshohet se është përdorur në sulm.
Sipas Ministrisë së Brendshme britanike, i dyshuari mbërriti në Mbretërinë e Bashkuar në vitin 2023 dhe po atë vit mori statusin e refugjatit. Leja e tij e qëndrimit është e vlefshme deri në vitin 2028.
Policia beson se ai kishte udhëtuar nga Sudani në Paris, më pas kishte fluturuar drejt Dublinit dhe kishte mbërritur në Belfast me autobus më 10 shkurt 2023, ditën kur paraqiti kërkesën për azil. Autoritetet kanë bërë të ditur se ai nuk ishte i njohur më parë për policinë dhe nuk figuronte në bazat e të dhënave të sigurisë kombëtare.