Salianji i shpall “luftë” Sali Berishës, i publikon vendimin e gjykatës britanike: Sali “kolltuku” i lidhur me krimin e organizuar…(E PLOTË)

Ish-deputeti i Partisë Demokratike, Ervin Salianji, i ka shpallur “luftë” liderit të kësaj force politike, Sali Berishës. Ai e ka akuzuar së fundmi për lidhje me krimin e organizuar, përmes një reagimi të publikuar në rrjetin social Facebook.

Në qëndrimin e tij, Salianji shprehet se Berisha është një figurë e damkosur politikisht, duke pretenduar se lidhjet e tij me korrupsionin dhe krimin janë të faktuara nga vendimmarrje dhe institucione perëndimore, e jo nga gjykatat shqiptare. Sipas tij, kjo përbën një realitet të pamohueshëm që ka ndikuar drejtpërdrejt në imazhin dhe funksionimin e Partisë Demokratike.

“Sali “kolltuku”, alias Sali “brava”, është sot i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe si politikan që i ka përdorur këto lidhje për influencë politike.

Jo nga gjykatat e kapura të regjimit në Shqipëri. Por nga qeveri të djathta perëndimore dhe nga gjykata britanike. Ky është fakt. Jo propagandë”, shkruan Salianji, teksa i ndalur më tej te takimi që Berisha pati me të vetët këtë të diel në Dibër, ish-deputeti e ka konsideruar atë si dëshmi të rënies së mbështetjes ndaj ish-kryeministrit, duke theksuar pjesëmarrjen e ulët dhe mungesën e entuziazmit në radhët e demokratëve.

Postimi i plotë i Ervin Salianjit:

Sali “kolltuku” i damkosur, jo i akuzuar kot!

Sali “kolltuku”, alias Sali “brava”, është sot i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe si politikan që i ka përdorur këto lidhje për influencë politike.

Jo nga gjykatat e kapura të regjimit në Shqipëri.

Por nga qeveri të djathta perëndimore dhe nga gjykata britanike.

Ky është fakt. Jo propagandë.

Shfaqja e sotme në Dibër ishte tabloja më e qartë e rënies dhe tregoi pse ky uzurpator nuk bën garë!

Një sallë që nuk mbush dot as dy kate me 200 persona, megjithëse ishte mbledhur i gjithë qarku.

Një lider i braktisur nga demokratët.

Dhe një monolog i mbushur me mashtrime të vjetra.

Kur të lë populli, të mbetet vetëm zëri… dhe ai kthehet në zhurmë!

I njëjti model, i njëjti mentalitet

Lulzim Basha ishte “familjari i dashur” i Saliut:

e promovoi, e përdori dhe e mbrojti.

Sot, edhe pasi u largua Basha, modeli mbeti po ai:

* i njëjti ekip

* të njëjtat vese

* e njëjta mënyrë përzgjedhjeje deputetësh

* e njëjta “opozitë” që ulet në gjunjë për leje, tendera dhe pazare me Ramën

Ka vetëm një ndryshim:

Saliu sot është i refuzuar nga ndërkombëtarët, nga shoqëria dhe gjithnjë e më shumë nga vetë demokratët.

Prandaj nuk bën garë.

Prandaj ka uzurpuar PD-në si frikacak.

Sepse gara e nxjerr zbuluar dhe humb privilegjet dhe paratë per te cilat shet shpirtin!

Sot nis publikimin e fakteve.

Poshtë është një fakt i zi mbi të bardhë:

Vendimi i gjykatës britanike konfirmon se nuk bëhet fjalë për thashetheme, por për prova të mjaftueshme që lidhin Sali Berishën me korrupsion dhe krim të organizuar.

E vërteta e hidhur;

Ndërkohë që demokratët kërkojnë alternativë dhe fitore,

ata mbahen peng nga një figurë që është shpallur problem sigurie nga aleatët strategjikë të Shqipërisë.

Kjo është drama reale e Partisë Demokratike:

jo përballja me kundërshtarin se atë e mundim, por pengmarrja nga e shkuara

Koha e alibive ka mbaruar.

Ose PD ndahet nga e shkuara e korruptuar,

ose mbetet peng i saj.