Rritja e çmimit të hidrokarbureve, gazetari ironizon: Në Maqedoni, Kosovë, Mal të Zi dhe Greqi është më lirë, pasi këto vende s’kanë naftë
Gazetari Lutfi Dervishi ka ironizuar rritjen e çmimit të naftës në vendin tonë, i cili ka kapur vlerën e 220 lekëve për litër, për shkak të luftës që ka përfshirë Lindjen e Mesme prej 24 ditësh.
Në një postim në Facebook, Dervishi shkruan se nafta në Maqedoni, Kosovë, Mal të Zi dhe Greqi është më e lirë se tek ne, pasi këto vende s’kanë naftë.
Më tej gazetari shkruan “si çdo pasuri e madhe, edhe kjo paguhet… me çmim luksi”.
Postimi i gazetarit:
Ka tri arsye pse nafta në Maqedoni, Kosovë, Mal të Zi dhe Greqi është më e lirë se tek ne:
E para, këto vende s’kanë naftë.
E dyta, fatkeqësisht për ta, nuk kanë as Shpiragun.
E treta, asnjë prej tyre nuk e ka shprehjen “i bëri naftën”.
Ne i kemi të trija.
Dhe si çdo pasuri e madhe, edhe kjo paguhet… me çmim luksi.
