Qeveria spanjolle i përgjigjet kërcënimeve të Donald Trump për ndërprerjen e tregtisë: Ai duhet të respektojë ligjin ndërkombëtar!

Qeveria e Spanjës ka reaguar ndaj deklaratave të presidentit amerikan, Donald Trump, i cili sot paralajmëroi se do të ndërpresë të gjithë tregtinë me Madridin, duke e cilësuar “të tmerrshme” për shkak të mungesës së bashkëpunimit mbi çështjen e bazave ushtarake.

Në një deklaratë zyrtare, ekzekutivi spanjoll theksoi se çdo rishikim i marrëdhënieve tregtare duhet të bëhet duke respektuar autonominë e kompanive private, të drejtën ndërkombëtare dhe marrëveshjet bilaterale mes Bashkimit Evropian dhe Shteteve të Bashkuara.

Ministrja e Punës dhe Ekonomisë Sociale, njëkohësisht Zëvendëspresidente e Qeverisë, Yolanda Díaz, kritikoi ashpër fjalët e Trump.

“Spanja nuk pranon shantazhe apo leksione nga një vend agresor. Ne jemi një vend paqeje. Nëse Shtetet e Bashkuara duan një aleat, duhet të fillojnë duke respektuar sovranitetin tonë dhe ligjin ndërkombëtar,” deklaroi ajo në një mesazh publik.

Mediat spanjolle raportojnë se vendi është një anëtar kyç i NATO‑s, që përmbush detyrimet e tij dhe kontribuon ndjeshëm në mbrojtjen e territorit evropian.