Lidhja e vetme hekurudhore e Shqipërisë me vendet fqinje, konsorciumi francezo-spanjoll do të mbikëqyrë linjën Vorë-Hani i Hotit

Hekurudha Shqiptare kanë nënshkruar një marrëveshje prej 8.8 milionë eurosh me një konsorcium të udhëhequr nga firma franceze e inxhinierisë Safege për mbikëqyrjen e rehabilitimit të një linje hekurudhore prej 120 kilometrash që lidh Vorën me Hanin e Hotit në kufirin me Malin e Zi, tha Banka Evropiane për Rindërtim dhe Zhvillim (BERZH).

Konsorciumi, i cili përfshin edhe firmën spanjolle të inxhinierisë Eptisa, do të ofrojë shërbime konsulence për mbikëqyrjen e të gjitha punimeve, si dhe kontrata furnizimi dhe instalimi elektrik dhe mekanik që lidhen me projektin e rehabilitimit të hekurudhës Vore-Hani i Hotit.

Data e përfundimit të kontratës është gushti i vitit 2032. Investimi në projekt është vlerësuar në rreth 373 milionë euro, me BERZH-in që vepron si institucioni kryesor financiar, duke ofruar një kredi prej 98.7 milionë eurosh.

Banka Evropiane e Investimeve ka thënë se do të ofrojë një kredi prej rreth 120 milionë eurosh për koston e projektit. BE-ja gjithashtu po bashkëfinancon me 136 milionë në grante.

Ofertimi nga kandidatët e përzgjedhur në listën e ngushtë në tenderin për projektin u mbyll më 16 mars, raporton SeeNews.

Linja hekurudhore Vorë – Hani i Hotit, pjesë e korridorit mesdhetar të Rrjetit Trans-Evropian të Transportit (TEN-T) të BE-së, shërben si lidhja e vetme hekurudhore e Shqipërisë me vendet fqinje, duke lidhur Tiranën me Podgoricën.