Poston FOTON krah Liri dhe Sali Berishës kur ishte i vogël, Stresi reagon pas zgjedhjes si anëtar i Këshillit Kombëtar të PD-së: Rruga sapo ka nisur

Këngëtari Arkimed Lushaj, i njohur me emrin artistik Stresi, ka reaguar në lidhje me zgjedhjen e tij si anëtar i Këshillit Kombëtar të Partisë Demokratike, gjatë Kuvendit Kombëtar të PD-së, që u mbajt të shtunën.

Teksa ka postuar një foto ku shfaqet kur ishte i vogël, krah kryedemokratit Sali Berisha dhe bashkëshortes së tij, Liri Berisha, Stresi ka falënderuar demokratët për besimin e dhënë ndaj tij.

Më tej, reperi nënvizon se angazhimi i tij në politikë lidhet edhe me kontributin që familja e tij ka dhënë për PD-në, ndërsa shton se dëshiron ta çojë më përpara këtë mision.

“Vij nga një familje që ka kontribuar dhe ka sakrifikuar për idealet demokratike, një trashëgimi që e kam ruajtur gjithmonë si gjënë më të çmuar dhe që nuk e kam shkelur kurrë, pavarësisht sfidave apo rrugëve që kam zgjedhur në jetë”, thekson ai.

Gjithashtu, ai nuk lë pa ironizuar edhe mediat, teksa shkruan se tashmë do të jetë kryefjala e lajmeve.

Postimi i plotë:

Faleminderit nga zemra!

Dje mora një përgjegjësi dhe nder të madh duke u zgjedhur anëtar i Këshillit Kombëtar të Partisë Demokratike.

Mirënjohje për secilin që më mbështeti dhe pa tek unë mundësinë për të përfaqësuar zërin e tij. Një falënderim i veçantë shkon për të rinjtë, energjia dhe besimi i të cilëve më motivojnë edhe më shumë për rrugën që kemi përpara.

Për mua, ky nuk është thjesht një angazhim politik. Është vazhdim i një qëndrimi familjar që është përcjellë ndër breza. Vij nga një familje që ka kontribuar dhe ka sakrifikuar për idealet demokratike, një trashëgimi që e kam ruajtur gjithmonë si gjënë më të çmuar dhe që nuk e kam shkelur kurrë, pavarësisht sfidave apo rrugëve që kam zgjedhur në jetë.

Sot nuk ndihem fitues si individ. Ndihem i detyruar moralisht të punoj dhe të jap më të mirën për ata që më besuan këtë përgjegjësi.

Një falënderim i veçantë edhe për disa media, portale dhe analistë që prej vitesh nuk kanë reshtur së foluri për mua. Dje më bëtë sërish nderin të jem në faqet e para. Edhe kur kemi qenë në qëndrime të ndryshme, më keni kujtuar se rruga drejt suksesit kalon përmes këmbënguljes dhe mosdorëzimit.

Mirënjohës për mbështetjen tuaj. Rruga sapo ka nisur.