“Do ishte dhuratë për Le Pen”. Macron mund ta bllokojë sërish hyrjen e Shqipërisë në BE?
Një shkrim me autorë Clea Caulcutt, Nicholas Vinocur, Giorgio Leali dhe Tim Ross botuar në POLITICO flet për problemet e brendshme të presidentit francez.
Bisedat e “Politico” me 10 diplomatë dhe zyrtarë nga i gjithë Bashkimi Evropian (të cilëve iu dha anonimitet për të diskutuar hapur fatin politik të presidentit francez) sugjerojnë se problemet e brendshme të 47-vjeçarit të qendrës dhe përqendrimi në të ardhmen e tij e kanë bërë atë një pengesë për progresin në BE dhe jo një motor të tij.
“Muri i droneve” i propozuar nga Presidentja e Komisionit Ursula von der Leyen për të mbrojtur qiellin evropian nga mjetet ajrore pa pilot gjithnjë e më pushtuese të Rusisë?Jorealiste, sipas Macron.
Ideja e Presidentit të Këshillit Evropian António Costa për të përmirësuar procesin e pranimit në BE duke eliminuar nevojën për unanimitet? Jo. Franca nuk po heq dorë nga fuqia e saj e vetos.
Ta bëjmë planetin tonë përsëri të madh? Ndoshta një ditë tjetër.
Muajt e fundit Macron është bërë më i kujdesshëm, duke hezituar përballë propozimeve që rrezikojnë të gjenerojnë një reagim të ashpër në Francë.
“Ky Macron është konsumuar nga problemet e brendshme”, tha një diplomat i BE-së. “Ai nuk është më kampioni europian që njihnim dikur’.
Shkrimi trajton dhe çështjen e zgjerimit, ku përmend Shqipërinë.
Macron është parë prej kohësh si mbështetës i futjes së anëtarëve të rinj në Bashkimin Evropian për të rritur peshën ekonomike dhe gjeopolitike të bllokut. Ai udhëhoqi Komunitetin Politik Evropian si një lloj “dhome pritjeje” për anëtarët që aspirojnë të bëhen anëtarë të BE-së në vitin 2022, dhe një vit më vonë u zotua të sillte vendet kandidate aspirante në bllok sa më “shpejt të jetë e mundur”.
Po tani? Sipas një aleati të lartë të Macronit, presidenti francez thjesht nuk ka kapitalin politik për të mbështetur disa nga ambiciet e tij, veçanërisht ato që u japin ushqim euroskeptikëve dhe Tubimit Kombëtar të ekstremit të djathtë të Marine Le Pen.
“Nuk është momenti i duhur, kemi të djathtën ekstreme që na fryn në qafë”, tha aleati.
“Çdo bisedë për hyrjen e Shqipërisë dhe Malit të Zi në Bashkimin Europian është një dhuratë për… Le Pen”, tha ai, duke vënë në dukje se fermerët francezë do të ishin të parët që do të dilnin në rrugë për të protestuar kundër hyrjes në BE të gjigantit bujqësor, Ukrainës.
Macron ka ndërruar 5 kryeministra në më pak se 2 vjet dhe pothuajse u detyrua të kërkonte një të gjashtë pasi zgjedhja e tij aktuale, Sébastien Lecornu, dha dorëheqjen pasi qeveria e tij e parë zgjati vetëm 14 orë. Presidenti francez e riemëroi Lecornu dhe kriza u zbut, të paktën përkohësisht.
Teksa Macron i afrohet muzgut të presidencës së tij, ai mund të skicojë disa plane të mëdha për Evropën, por aftësia e tij për t’i kthyer ëndrrat në realitet është eklipsuar kryesisht.
Evërteta shkatërruese për ata që punojnë në institucionet dhe ambasadat e Brukselit është se ndikimi i Macron është dobësuar seriozisht. Dhe se projekti i tij i madh pro-evropian ka mbaruar.