Socialistët “ndezin motorët” për zgjedhjet në Tiranë! Rama përzë Anuela Ristanin nga mbledhja me nënkryetarët dhe Manastirliun

Kryeministri Edi Rama zhvilloi këtë të mërkurë një takim në Kryeministri me katër nënkryetarët e Bashkisë së Tiranës dhe Ogerta Manastiruliun, kandidaten e shpallur nga Partia Socialiste për bashkinë e kryeqytetit.

Mbledhja zgjati për rreth 2 orë, ndërkohë që e pranishme ishte edhe Anuela Ristani, kryetarja e komanduar e Bashkisë së Tiranës. Por, qëndrimi i saj në këtë mbledhje nuk ka qenë i gjatë, pasi burime për mediat bëjnë me dije se kryeministri i ka kërkuar që të largohet.

Mbledhja e kësaj të mërkure ka ardhur një ditë pas asaj të Këshillit Bashkiak në Bashkinë e Tiranës ku miratuan propozimin për shkarkimin e kryetarit të arrestuar të Bashkisë, Erion Veliajt.

Sakaq pritet që në orët në vijim, konkretisht në 18:00, kryeministri Edi Rama të mbledhë edhe deputetët e Tiranës dhe ministrat e kabinetit qeveritar. Takimi do të mbahet në parkun “Eden” në Kryeministri dhe fokusi kryesor i diskutimeve pritet të jetë organizimi i Partisë Socialiste për zgjedhjet e ardhshme në Bashkinë e Tiranës..

Po ashtu, këtë të mërkurë prefekti i Qarkut Tiranë pa humbur kohë i ka dërguar zyrtarisht Këshillit të Ministrave propozimin e Këshillit Bashkiak të Tiranës për shkarkimin e kryebashkiakut Veliaj. Nesër pritet të zhvillohet mbledhja e qeverisë, ku parashikohet miratimi i shkarkimit.