Gjyqi në GJKKO/ Veliaj mungon në seancë: Nuk më janë vënë në dispozicion 24 fashikujt dhe provat digjitale

Në GJKKO ka nisur seanca e parë e gjyqit në themel për kryebashkiakun Erion Veliaj e të tjerë të pandehur në dosje që kanë kërkuar gjykimin me proces normal.

 Në një deklaratë për Gjykatën kryebashkiaku Veliaj shprehet se nuk do të jetë i pranishëm në seancë.

“Nuk do të jem i pranishëm pasi SPAK nuk ka zbatuar vendimin e Gjykatës për të dorëzuar fashikujt e munguar dhe provat dixhitale dhe të mundesojë të marr pjesë si njeri i lirë në sallën e gjyqit. Kërkoj të përfaqësohem nga avokati Plarent Ndreca”, ka deklaruar Veliaj.

Por më pas, avokati i tij, Plarent Ndreca sqaroi se aktet i kanë marrë vetëm dje në orën 15:00 dhe kërkoi kohë që të njihet me aktet. SPAK kundërshtoi ndërsa GJKKO vendosi vijimin e seancës, por nuk lejoi transmetimin live.

Seanca e fundit e mbajtur më 10 qershor, u shty për shkak të mungesës së disa prej avokatëve mbrojtës të të pandehurve. Veliaj gjithashtu mungoi dhe shkak është mbyllja të kafazin e xhamit. Kryebashkiaku e cilëson mbajtjen në kafaz si të paligjshme, antikushtetuese dhe diskriminuese.