Tiranë/ Si do dezinfektohen pallatet e vjetra që nuk kanë ende një administrator dhe masat lehtësuese për bizneset

Bashkia e Tiranës po kujdeset që të dezinfektojë të gjitha rrugët dhe hapësirat publike, ndërsa  administratorët e pallateve po realizojnë dezinfektimin e ashensorëve dhe shkallëve të pallateve.

Kryebashkiaku Erion Veliaj sqaroi rastet, kryesisht pallate të vjetra që nuk kanë zgjedhur ende një administrator.

“Shumica e pallateve kanë administratorë. Le të themi 3500, 4000-5000 pallate kanë administrator . Për të tjerët ne i kemi kërkuar qytetarëve të lajmërojnë në njësinë e tyre administrative dhe do të vij Bashkia ta bëjë. Unë vetë jam kontaktuar nga shumë qytetarë që thonë Lali Eri ke të drejtë duhet ta kishim zgjedhur administratorin, por ja nuk kemi bërë mukajetin dhe kemi vajtur ne e kemi bërë. Kështu që për pallatet pa administrator këtë mund ta bëjë Bashkia, por mjafton që të raportojnë në njësinë e tyre administrative dhe ne do të sigurohemi që shkon një skuadër të bëjnë dezinfektimin”, tha Veliaj.

Ai tregoi se si do të zbatohet paketa e masave lehtësuese që po diskutohet për të ndihmuar bizneset.

“ Jemi duke diskutuar  me kryeministrin që të marrim disa masa. Disa masa janë të qeverisë qendrore, siç ishte fjala vjen vonesa e kredive, disa masa do jenë të qeverisë lokale. Fjala vjen, në momentin që nuk ka lokale që funksionojnë, nuk shoh asnjë arsye pse bashkia, për aq sa do zgjasi kjo karantinë, të mbledhi le të themi taksën e hapësirës publike. Jo vetëm kaq, por i kemi propozuar Drejtorisë sonë të Tatim-Taksave, pikërisht që ne të bëjmë këto kalkulime, ta shtyjmë mbledhjen e taksave nga prilli, ta shtyjë në maj. Pra të na japë edhe ne 30 ditë kohë që të marrim vendimet e duhura për të bërë disa lehtësira. Kështu që jam i bindur që lehtësira për këtë periudhë pauze, do të ketë dhe shoh që bashkia përsa i përket taksave lokale, aty ku nuk ka funksionuar biznesi për këtë kohë, nuk shoh asnjë arsye pse duhet t’i mbledhë. Kështu që besoj që, t’ju jap një rast konkret. Nëse le të themi karantina zgjat një muaj, atëherë do të zbritet me 1/12 taksa e hapësirës publike, për atë muaj që nuk është përdorur hapësira publike. Kështu që të paktën, për bizneset që operojnë në Tiranë, s’do duhet të kenë stresin e pagesës së taksave për ditët që realisht nuk ka pasur punë”, deklaroi ai.