SPAK kërkon pushimin e çështjes ndaj ish-kreut të KPP, Jonaid Myzyri

Gjykata e Posaçme ka zhvilluar këtë të mërkurë (13 maj) seancën mbi procesin ndaj ish kreut të Komisionit të Prokurimit Publik Jonaid Myzyri, për të cilin SPAK ka kërkuar pushimin e çështjes për veprën penale të shkeljes së barazisë në tendera.

Kërkesa për pushim është bërë nga prokuroria me argumentin se pasi u ezauruan të gjitha fazat e hetimit u konstatua se fakti ekziston, por nuk përbën vepër penale.

Prokurori Elvin Gokaj në parashtrimet përpara gjykatës tha se janë kryer të gjitha veprimet hetimore dhe nuk u provua që ka vepër penale nga Myzyri dhe të tjerët, Vilma Zhupaj, Lindita Skeja, Merita Zeqaj dhe Enkeleda Bega.

Avokatët mbrojtës thanë se anëtarët e KPP nuk bëjnë procedura tenderimi, por vetëm procedura ankimimi.

Gjyqtari Paulin Çera pasi dëgjoi palët mori kohë për të shpallur vendimin, në datë 25 maj ora 10.30.