Ish-komandanti i Gardës Revolucionare kërcënon Donald Trump: Përgatitu për një varrezë aeroplanmbajtëse në Hormuz

Garda Revolucionare e Iranit ka deklaruar se Shtetet e Bashkuara ndodhen përballë vetëm dy zgjedhjeve në tensionet e vazhdueshme në Lindjen e Mesme, ose një operacion ushtarak që e cilëson “të pamundur”, ose një “marrëveshje të keqe” me Republikën Islamike.

Në një deklaratë të transmetuar nga televizioni shtetëror iranian, forca elitare e ushtrisë iraniane tha se presidenti amerikan Donald Trump duhet të vendosë mes këtyre dy opsioneve, duke theksuar gjithashtu një ndryshim të qëndrimeve ndërkombëtare nga Kina, Rusia dhe Evropa në raport me Uashingtonin. Në deklaratë përmendet edhe ajo që Teherani e quan “ultimatum iranian” lidhur me bllokadën amerikane të porteve iraniane.

Paralelisht me deklaratën zyrtare, ish-komandanti i Gardës Revolucionare, Mohsen Rezaei, ka rritur tonet e paralajmërimeve në rrjetet sociale, duke e krahasuar praninë e forcave amerikane në Ngushticën e Hormuzit me “piratë”.

Në një postim në platformën X, Rezaei deklaroi se Shtetet e Bashkuara janë “të vetmit piratë në botë që përdorin transportues avionësh”, duke shtuar se aftësia e Iranit për t’u përballur me këto forca “nuk është më e vogël se aftësia për të fundosur anije luftarake”.

“Përgatituni të përballeni me një varrezë të transportuesve dhe forcave tuaja ajrore, ashtu si rrënojat e avionëve tuaj u lanë pas në Isfahan”, shkroi ai, duke iu referuar një incidenti të mëparshëm ushtarak të përmendur nga Teherani.