“Pi aspirinë që gjaku i hollë të më rrjedhë në zemër”, Trump bën një rrëfim të rrallë në televizion për shëndetin e tij, në prag të 80 vjetorit

Presidenti Donald Trump ka bërë një rrëfim të rrallë në lidhje me shëndetin e tij, ndërsa përgatitet të mbushë 80 vjeç këtë verë. Duke folur në emisionin Squawk Box të CNBC, ai e sulmoi ashpër Joe Biden, për të cilin tha se “nuk mund të ngjitej shkallëve”.

“Harrojeni për zbritjen, ai nuk mund të ngjitej në një shkallë. Ai po binte kudo. Duhet të jem i kujdesshëm sepse nëse pengohem ose rrëzohem, do të jetë goditja më e madhe… Kjo është arsyeja pse kur zbres nga ato avionë, eci bukur dhe ngadalë. Nuk dua të vendos ndonjë rekord shpejtësie”, ka thënë ai.

Ish-presidenti Joe Biden është penguar në shkallët e avionit presidencial Air Force One menjëherë pas presidencës së tij, u rrëzua një herë në skenë dhe u pengua ose humbi për pak kohë ekuilibrin në shkallë në rreth tre raste të tjera në publik.

Kurse udhëheqësi amerikan rrallë pranon shqetësimet në lidhje me shëndetin e tij, të cilat janë ngritur shumë herë që kur ai u rikthye në detyrë në janar.

Në një ceremoni të Medaljes së Nderit në Shtëpinë e Bardhë në mars, fotografët kapën një skuqje të kuqe e cila shkaktoi shqetësime të mëtejshme shëndetësore për Donald Trump. Ai është fotografuar më parë me mavijosje të mëdha në pjesën e pasme të dorës së djathtë.

Mjeku i tij, Sean Barbabella, tha se Trump merr rreth 325 mg aspirinë çdo ditë për të parandaluar një atak në zemër ose goditje në tru. Doza mesatare është afërsisht 100 mg.

“Thonë se aspirina është e mirë për hollimin e gjakut dhe unë nuk dua që gjaku i trashë të më rrjedhë nëpër zemër. Dua gjak të hollë e të mirë që të më rrjedhë në zemër. A ka kuptim kjo?

Ata preferojnë që unë të marr atë më të voglin, por unë marr atë më të madhin, por e kam bërë për vite me radhë dhe ajo që bën është se shkakton mavijosje”, është shprehur presidenti Donald Trump.