Sulmi i Iranit në bazën britanike në Qipro, evakuuohet personeli dhe fshati i Akrotirit! Ushtria rrëzon edhe dy dronë të tjerë

Baza ajrore britanike e Akrotirit në Qipro, raportohet se është goditur mëngjesin e sotëm nga një dron nga Irani. Bëhet me dije se nuk ka persona të lënduar nga ky sulm.

Ndërsa pak çaste më vonë, dy dronë pa pilot që ishin në drejtim të bazës ajrore të Akrotirit të Mbretërisë së Bashkuar në Qipro “u trajtuan në kohën e duhur”, tha zëdhënësi i qeverisë Konstantinos Letymbiotis  këtë të hënë.

Më herët, një “kërcënim i dytë për sigurinë” u shpall në bazën ajrore të Akrotirit të Mbretërisë së Bashkuar në Qipro pak pas mesditës së së hënës , ndërsa fshati i Akrotirit u evakuua gjithashtu.

Mediat qipriote shkruajnë se autoritetet e bazave britanike kishin zgjedhur të evakuonin bazën ajrore, qeveria qipriote vendosi të jepte udhëzime që edhe fshati Akrotiri të evakuohej.

Fshatrat e tjerë brenda zonës së bazës së Akrotirit nuk u evakuuan. Raportime të pakonfirmuara sugjeruan gjithashtu se baza e Dhekelias, e vendosur në lindje të ishullit, u evakuua gjithashtu, ndërsa alarme u dëgjuan në ambasadën e Shteteve të Bashkuara në Nikozia, dhe besohet se rënia e këtyre alarmeve mund të ketë qenë e lidhur me lëshimin e dronëve.

Po ashtu personelit në bazë iu njoftua kërcënimi dhe iu dhanë udhëzime të “ktheheshin në shtëpitë e tyre dhe të qëndronin brenda deri në njoftim të mëtejshëm”.

Atyre iu tha gjithashtu të “largoheshin nga dritaret dhe të fshiheshin pas ose poshtë mobiljeve të forta e të trasha” dhe të prisnin udhëzime të mëtejshme.

Kërcënimi i dytë erdhi pasi pista në Akrotiri u godit nga një dron pak pas mesnatës, me personelin në baza që u informua në orën 1:18 të mëngjesit se një “ dron i vogël ” kishte “goditur fushën e aeroportit”.

Gjithashtu u konfirmua se nuk pati viktima si pasojë e sulmit të natës, por se ishin shkaktuar “dëme të vogla”.