Rama i besoi drejtimin e Shkodrës! Enea Karakaçi mbërrin në qytetin verior, pasi i dorëzoi “stafetën”, Benet Beci e mirëpret në Asamblenë Socialiste
Ministri i Infrastrukturës dhe Energjisë, Enea Karakaçi ka mbërritur pasditen e sotme në qytetin e Shkodrës, ku u mirëprit nga kryebashkiaku Benet Beci.
Në videon e siguruar nga burimet, Karakaçi shikohet i shoqëruar nga Benet Beci të cilët ecin në drejtim të ambienteve të Asamblesë Socialiste.
Pas takimit, Karakaçi u shpreh se atyre u është lënë si detyrë nga Asambleja që të energjizojnë strukturat dhe të fillojnë anëtarësime të reja.
“Një takim i veçantë për mua pasi unë kthehem në qytetin tim. Kemi ndezur motorat, qëllimet janë shumë të qarta. Janë lënë në detyrë nga Asambleja e Partisë Socialiste të energjizojmë strukturat dhe të fillojmë anëtarësime të reja. Përgatitemi që në zgjedhjet e vitit pasardhës të jemi sa më të përgatitur dhe të marrim një rezultat të shkëlqyer”, tha Karakaçi në një proncim për gazetarët.
Kujtojmë se në mbledhjen e Asamblesë së Partisë Socialiste, gjatë të cilës u bë një riformatim të drejtuesve politikë në qarqe, kryeministri Rama i besoi Karakaçit drejtimin e Shkodrës. Një pozicion të cilin më parë e mbante Benet Beci.
