“Ne sapo kemi filluar, po vijnë valë më të mëdha”, Amerika trondit regjimin iranian, Sekretari i Luftës: Eliminuam udhëheqësin iranian që u përpoq të vriste Donald Trump
Sekretari Amerikan i Luftës, Pete Hegseth është shprehur në një konferencë për shtyp sot, se një udhëheqës iranian që u përpoq të vriste Presidentin Donald Trump, është eliminuar nga trupat amerikane.
Duke folur për përditësimet në Luftën e Iranit këtë mëngjes në Pentagon, Hegseth përmendi dronët dhe raketat e rrëzuara nga trupat amerikane dhe u mburr për fuqinë e zjarrit amerikane.
“Dje, udhëheqësi i njësisë që u përpoq të vriste Presidentin Trump u ndoq dhe u vra. Irani u përpoq ta vriste Presidentin Trump, dhe Presidenti Trump qeshi i fundit”, është shprehur Sekretari Amerikan i Luftës.
Ai vazhdoi duke thënë se misioni nuk është “i përmbushur”, por përmendi se si një nëndetëse ushtarake amerikane fundosi një anije luftarake iraniane që “mendonte se ishte e sigurt në ujërat ndërkombëtare”.
“Kjo nuk ishte menduar kurrë të ishte një ndeshje e drejtë, dhe nuk është një ndeshje e drejtë… ata do të bien”, është shprehur ai, teksa ka shtuar, “Po vijnë valë gjithnjë e më të mëdha; ne sapo kemi filluar.”
Numri i të vdekurve në Iran nga lufta e vazhdueshme me Shtetet e Bashkuara dhe Izraelin ka arritur në të paktën 1,045 persona, tha të mërkurën një agjenci qeveritare iraniane. Fondacioni i Iranit tha se ai përfaqësonte numrin e trupave të identifikuar deri më tani dhe të përgatitur për varrim.
Sot, në ditën e pestë të luftës me Iranin, Shtetet e Bashkuara dhe Izraeli goditën Teheranin dhe qytete të tjera në sulme të shumta ajrore.
Izraeli shënjestroi udhëheqjen iraniane dhe forcat e sigurisë, ndërsa Republika Islamike u përgjigj me breshëri raketash dhe sulme me dronë ndaj Izraelit dhe në të gjithë rajonin.
Banorët e Teheranit u zgjuan nga shpërthimet në agim dhe televizioni shtetëror iranian tregoi rrënojat e një ndërtese në qendër të kryeqytetit. Qyteti i seminarit shiit të Qomit dhe shumë qytete të tjera u vunë gjithashtu në shënjestër.