Drejtësia në rrezik, hakerat iranianë futen në sistemin e Gjykatës së Lartë dhe Prokurorisë së Përgjithshme, u marrin dokumentet e rëndësishme
Grupi i hakerave iraniane ka vënë sërish në shënjestër institucionet e drejtësisë në vendin tonë. Pas sulmit kibernetik ndaj Kuvendit të Shqipërisë, mësohet se “Homeland Justice” ka goditur së fundmi sistemin e Gjykatës së Lartë dhe Prokurorinë e Përgjithshme.
Ka qenë vetë grupi i hakerave që ka bërë publik sulmin përmes rrjeteve sociale, duke pretenduar se ka depërtuar në rrjetet e brendshme të institucioneve dhe ka siguruar dokumente dhe të dhëna që lidhen me funksionimin e tyre.
Në njoftimin e tyre, Homeland Justice e paraqet këtë sulm si një formë hakmarrjeje, duke e lidhur me strehimin në Shqipëri të anëtarëve të Mujahedin-e Khalq (MEK). Grupi ka përshkruar situatën e tyre në vend si një garnizon terrorist në Durrës dhe ka ngritur një seri kërkesash:
1. T’i jepet fund jetës së garnizonit terrorist të Durresit: A nuk pretendoni se u keni dhënë strehë këtyre 3,000 qytetarëve të zakonshëm (!!!) në mënyrë që ata të mbijetojnë dhe të jetojnë si të tjerët?! Atëherë, pse nuk ka asnjë pjesë të jetës së tyre që i ngjan jetës normale? Jeta në një kamp ushtarak, jeta brenda kornizës së një kulti shkatërrues që ndante fëmijët nga prindërit e tyre, divorcet e detyruara, martesat e detyruara, jeta pas mureve të larta të një garnizoni në mënyrën më të tmerrshme dhe misterioze të mundshme! I quani këta “qytetarë të zakonshëm”?!
2. Gjyqi i krerëve të MEK: Krerët e MEK, të cilët kanë qenë në listën e grupeve dhe organizatave terroriste të vendeve të ndryshme (madje edhe më parë atë të regjimit Epstein) për vite me radhë dhe kanë vrarë disa mijëra qytetarë të pafajshëm, duhet të nxirren në gjyq. Derisa të mbahet një gjyq i drejtë për këta vrasës të pamëshirshëm, ne jo vetëm që nuk do t’i zvogëlojmë sulmet tona, por do t’u shtojmë atyre dimensione më të gjera, më të reja dhe më të paparashikueshme.
3. Mbledhja dhe pavlefshmëria e dokumenteve të identitetit të rreme të këtyre horrave me një mijë fytyra: Pse këta të ashtuquajtur qytetarë të zakonshëm (!!!) kanë marrë dokumente identiteti të rreme me lejen e drejtpërdrejtë të Autoriteteve Gjyqësore dhe institucioneve qeveritare të Shqipërisë? A nuk duhet që refugjatët të përdorin mjediset e vendit të tyre të destinacionit si njerëzit e zakonshëm?
Deri tani, autoritetet shqiptare nuk kanë dhënë një konfirmim zyrtar mbi përmasat e sulmit apo nëse të dhënat sensitive janë komprometuar.
Ky incident vjen në një moment kur siguria kibernetike e institucioneve shtetërore po vihet nën provë, duke rritur shqetësimet për mbrojtjen e të dhënave dhe integritetin e drejtësisë në Shqipëri.