‘Bye bye’ politika, Monika Kryemadhi i futet zyrtarisht kinemasë

Monika Kryemadhi ka hapur një kapitull të ri në karrierën e saj, këtë herë jashtë politikës dhe në botën e kinemasë shqiptare. Ajo ka debutuar si aktore dhe producente me filmin “Me fat”, duke u prezantuar në një rol krejtësisht të ndryshëm nga ai me të cilin publiku e njeh zakonisht.

Në konferencën e prezantimit të filmit, Kryemadhi theksoi se kjo është një përvojë e re dhe emocionuese për të, duke përjetuar për herë të parë një aktivitet publik që nuk ka lidhje me politikën. Sipas saj, ftesa për t’u bërë pjesë e projektit erdhi në një periudhë personale të vështirë, dhe ky film i ofroi mundësinë për të hyrë në një botë krejt tjetër.

“Ftesa më erdhi në një moment shumë të errët të jetës sime. Kur njeriu kërkon të dalë nga një periudhë e tillë, shpesh hidhet në një horizont të ri. Roli im është i vogël, por ka një rëndësi të madhe në rrugëtimin e personazheve dhe zgjedhjet që ata bëjnë,” deklaroi Kryemadhi.

Filmi “Me fat” është një dramë familjare që trajton sfidat e përditshme dhe vendimet e rëndësishme me të cilat përballen të rinjtë. Historia ndjek rrugëtimin e një të riu që ëndërron të bëhet kampion boksi, por sfidat e realitetit të vështirë e largojnë nga familja dhe e detyrojnë të përballet me zgjedhje të vështira për të ardhmen e tij.

Sipas aktorit, skenaristit dhe producentit Maksim Aladini, filmi fokusohet tek dashuria për familjen dhe ndjekja e ëndrrave, duke pasqyruar realitetin social dhe emocional të të rinjve shqiptarë. Në projekt marrin pjesë edhe aktorët Visjan Ukcenaj, Gent Hazizi dhe modelja Rea Begaj, të cilët theksuan se filmi trajton edhe tema sociale të rëndësishme, si ndikimi i zgjedhjeve personale, hakmarrja dhe sfidat që lindin nga realiteti i ashpër i jetës së përditshme.

Premiera e filmit “Me fat” është planifikuar për më 12 mars. Sipas Kryemadhit, e njëjta ditë do të jetë e ngarkuar, pasi paradite do të jetë prezent në Prokurorinë e Posaçme për çështje ligjore, ndërsa gjatë mbrëmjes do të ndodhë premiera e filmit. “Paradite kam gjyqin, ka edhe zhvillime të tjera politike gjatë ditës, ndërsa në mbrëmje është premiera e filmit,” tha ajo.

Ky projekt shënon një hap të ri për Kryemadhin, duke e vendosur në një fushë të re profesionale dhe duke i mundësuar publikut ta shohë në një dimension të ndryshëm, larg politikës.