Kush është 41-vjeçari Juan Carlos që do të marrë drejtimin e kartelit Jalisco pas vdekjes së El Mencho, nofkat dhe shtetësia e dyfishtë
Të paktën 60 persona janë vrarë në një valë dhune që ka shpërthyer në Meksikë pas vdekjes së Nemesio Oseguera, i njohur si “El Mencho”, udhëheqësi i kartelit Jalisco Neë Generation.
Operacioni policor ku dhe “El Mencho” humbi jetë u zhvillua në zonat më luksoze të Jalisco, në Tapalpa. Qeveria meksikane njoftoi të martën në mbrëmje se situata e sigurisë në shtet tani është stabilizuar.
Megjithatë, pas vrasjes së Nemesio Oseguera, kanë filluar spekulimet se kush do të marrë përsipër frenat e kartelit, dhe duket se kandidati kryesor për këtë pozicion është një burrë i lindur në Kaliforni. Sipas Neë York Post , Juan Carlos Valencia Gonzalez është shfaqur si kandidati kryesor për të marrë përsipër organizatën kriminale.
41-vjeçari është djali i adoptuar i El Mencho-s së vrarë. Sipas autoriteteve, nëna e tij, Rosalinda “La Jefa” Gonzalez Valencia, ishte e martuar me bosin e drogës dhe luajti një rol të rëndësishëm në financat e kartelit. Disa analistë spekulojnë se ajo mund të marrë përsipër drejtimin nga bashkëshorti i saj i ndjerë, por shumica pajtohen se ajo do ta mbështesë të birin.
El Pelon
Juan Carlos, i njohur gjithashtu si El Pelon, Tricky Tres dhe O3, ka shtetësi të dyfishtë amerikane dhe meksikane, pasi lindi në Santa Ana, Orange County në vitin 1984. Shumë detaje rreth jetës së tij të hershme mbeten të panjohura, por ai lindi ndërsa prindërit e tij, Rosalinda dhe Armando Valencia Cornelio, të cilët kishin lidhje me kartelin, jetonin në Kaliforni.
Lidhjet e dyshuara të El Pelon me drogën u zbuluan nga Agjencia Amerikane e Zbatimit të Ligjit për Drogën (DEA) në vitin 2020. Një hetim zbuloi se ai ishte përgjegjës për prodhimin dhe shitjen e “tonelatave të drogës“, si dhe krimeve të dhunshme që nga viti 2007.
Në korrik 2020, dolën video që tregonin krahun e armatosur të kartelit Jalisco, me ministrin e atëhershëm të Mbrojtjes të Meksikës që identifikoi një nga burrat në video si Juan Carlos.
Në tetor të atij viti, qeveria amerikane ngriti një padi federale kundër tij për komplot për shpërndarjen e një substance të kontrolluar dhe përdorim të një arme zjarri gjatë një transaksioni droge.
SHBA-të ofronin një shpërblim prej 5 milionë dollarësh për informacion që çonte në arrestimin ose dënimin e Juan Carlos. Departamenti i Shtetit i SHBA-së e përshkroi atë si “1.75 m të gjatë, me peshë 77 kg, me flokë dhe sy kafe”.
Duke njoftuar shpërblimin e vitit 2021, administratorja e DEA-s tha se hetimi ndaj Juan Carlos ishte i koduar “Operacioni Pinky and the Brain”. “Njoftimi i sotëm për shpërblimin nënvizon angazhimin e qeverisë amerikane për të ndjekur individët dhe organizatat që shkaktojnë dëmin më të madh në komunitetet tona”, tha ajo.
Juan Carlos u referua gjithashtu si “i dyti në komandë de facto” i kartelit pas njerkut të tij para vrasjes së tij.
Nëse karteli Jalisco do të mbetet në familje, ka pak mundësi përveç Juan Carlos. Vëllai më i madh i El Mencho, Antonio Oseguera Cervantes, u arrestua në SHBA së bashku me 28 udhëheqës të tjerë të kartelit vitin e kaluar. Ndërkohë, djali i tij, Ruben Oseguera Gonzalez, u dënua me burgim të përjetshëm plus 30 vjet dhe u detyrua të dorëzojë 6 miliardë dollarë në para të lidhura me drogën.
Një cikël i ri dhune?
Ekspertët kanë frikë se kushdo që të marrë pushtetin, sapo karteli të riorganizohet, dhuna në të gjithë Meksikën do të shpërthejë përsëri. Saucedo i tha CNN: “Ky nuk dukej të ishte thjesht një operacion për të kapur El Mencho, por për ta eliminuar atë, për të përdorur forcë vdekjeprurëse për ta neutralizuar atë. Në botën kriminale, veprime të tilla nuk kalojnë pa u vënë re. Reagimi është ai që po shohim tani: narkoterrorizëm, bllokada dhe djegie të dyqaneve ushqimore në të gjithë Meksikën.”