“Hipni në një varkë me të çmendurin De Niro dhe kthehuni nga keni ardhur”, Trump sulmon ligjvënësit myslimanë që i ndërprenë fjalimin në Kongres
Një debat i nxehtë politik shpërtheu në Shtetet e Bashkuara pas fjalimit të Donald Trump për Gjendjen e Kombit, kur kongresmenet demokrate Ilhan Omar dhe Rashida Tlaib e denoncuan publikisht presidentin nga salla e Kongresit. Të nesërmen, Trump u përgjigj me një sulm të ashpër, duke u bërë thirrje atyre të “kthehen nga kanë ardhur” dhe duke përdorur terma përçmues.
Në postimin e tij, presidenti i quajti dy kongresmenet “me IQ të ulët” dhe argumentoi se “ato duhet të institucionalizohen”, duke i përshkruar ato si “të çmendura, të çmendura dhe të sëmura”.
“Kur njerëzit mund të sillen kështu dhe duke ditur se janë politikanë të korruptuar, kaq të këqij për vendin tonë, ne duhet t’i kthejmë aty nga kanë ardhur, sa më shpejt të jetë e mundur”, shkroi ai. “Ata vetëm mund t’i dëmtojnë Shtetet e Bashkuara, nuk mund të kontribuojnë asgjë.”
Në të njëjtin postim, ai përfshiu edhe kundërshtarin e tij të njohur, aktorin fitues të çmimit Oscar, Robert De Niro, i cili kritikoi presidentin dhe administratën e tij në një aktivitet të quajtur “Gjendja e Kënetës”, të organizuar nga demokratët në Uashington.
Trump tha se Omar dhe Talib “duhet të jenë në një varkë me të çmendurin Robert De Niro”, të cilin ai e përshkroi gjithashtu si “të sëmurë dhe të çmendur” dhe “me IQ jashtëzakonisht të ulët”, duke shtuar se ai “nuk ka idenë se çfarë po thotë ose po bën”.
Ilhan Omar ka lindur në Somali dhe emigroi në Shtetet e Bashkuara si fëmijë në vitet 1990, ndërsa Rashida Tlaib është me prejardhje palestineze dhe ka lindur në Michigan. Përfaqësuesit e Omar dhe De Niro nuk iu përgjigjën menjëherë kërkesave për koment, sipas NBC Neës.
Një zëdhënës i Tlaib iu referua një postimi që ajo bëri në Platforma X, ku shkroi: “Ai nuk i duron dot dy gra myslimane që i përgjigjen dhe e korrigjojnë, dhe tani po shkatërrohet”.
Gjatë fjalimit të Trump për Gjendjen e Kombit dje, Omar dhe Tlaib filluan të bërtisnin kur presidenti amerikan foli për goditjen ndaj imigracionit të paligjshëm dhe hetimin e një rasti mashtrimi në Minesota që përfshinte komunitetin somalez. Kur presidenti tha se demokratët “duhet të turpërohen”, Omar kundërshtoi: “Duhet të turpërohesh!” Në një moment tjetër, Tlaib bërtiti “Gënjeshtar!”