Belinda Balluku reagon për herë të parë pas largimit nga kabineti qeveritar: “700 tenxheret politike mediatike e mbytën miletin”

Politikania e lartë socialiste Belinda Balluku ka reaguar për herë të parë pas vendimit të marrë në mbledhjen e Grupit Parlamentar të PS, për largimin e saj nga kabineti qeveritar, si zëvendëskryeministre dhe si ministre e Infrastrukturës dhe Energjisë.

Ajo ka shpërndarë një shënim të kryeministrit Edi Rama, i cili mëngjesin e kësaj të shtune reagoi dhe vetë për herë të parë për izolimin e juglindjes, për shkak të shembjes së rrugës në Dragostunjë.

Pavarësisht se nuk është më në detyrë, Belinda Balluku u ka dhënë zë fjalëve të Edi Ramës për kantierin e aksit të ri të Korridorit VIII (Elbasan – Qafë Thanë), një vepër e madhe infrastrukturore që ka nisur gjatë drejtimit prej saj të MIE.

Kryeministri Edi Rama ka vendosur këtë të enjte të riformatojë gjysmën e kabinetit qeverisës, me një nga vendimet e tij më surprizuese, teksa socialistët ishin “ngujuar” prej 9 orësh në Pallatin e Brigadave dhe ministrat u shpalosnin qytetarëve objektivat për të ardhmen.

Ashtu siç ai di të bëjë në fakt, kryeministri i habiti të gjithë ata që prisnin se çfarë do të vendosej për fatin politik të Belinda Ballukut, e cila është pezulluar nga detyra e Zëvendëskryeministres me kërkesë të SPAK, si e akuzuar për disa vepra penale.

Vendin e Ballukut si zëvendëse e Edi Ramës e gëzon tashmë Albana Koçiu, kurse postin ministror e ka marrë Enea Karakaçi.