Ferrat në mes të Komunës së Parisit, IMT dhe Bashkia mbushin pas 20 vitesh gropën e hapur për pallat: Do bëhet kënd lojërash (FOTO)
Gropa e hapur për një pallat në zemër të Komunës së Parisit, pranë vendit të njohur si “lulishtja”, do të mbushet me dhe dhe inerte të tjera. IMT dhe Bashkia e Tiranës kanë vendosur të ndërhyjnë pas rreth dy dekadash për ta shndërruar kënd lojërash.
Ferrat dhe pemët që ishin rritur prej vitesh në gropën e hapur për pallat, por që mbeti në mes për shkak të konflikteve gjyqësore, gati sa nuk po arrinin lartësinë e pallatit tjetër 10-katësh.
Rasti u denoncua nga deputeti i zonës, Erion Braçe, kur qeveria nisi projektin për lirimin e hapësirave publike dhe mesa duket, thirrja nuk ka rënë në vesh të shurdhët. Trupat e Bashkisë Tiranë kanë ndërhyrjen.
Llamarinat që rrethonin gropën prej më shumë se 20 vitesh janë hequr dhe kamionët kanë nisur mbushjen e saj me dhe, për shkak të sipërfaqes së konsiderueshme. Pas rehabilitimit fillestar, ajo do të shndërrohet në kënd lojërash për fëmijët.