Altin Dumani do të largohet me “kokën mbrapa”, MERAKU i kreut të SPAK dhe KËRKESA e tij për deputetët

Kreu i Prokurorisë së Posaçme, Altin Dumani ka shprehur vlerësimin maksimal për prokurorët dhe hetuesit që përbëjnë strukturën e SPAK, duke i cilësuar si themelin e rezultateve të arritura deri më tani.

Sipas tij, sukseset e institucionit nuk janë produkt i atij vetëm, por fryt i punës së prokurorëve të posaçëm, hetuesve të BKH-së dhe specialistëve financiarë, të cilët kanë investuar jetën e tyre profesionale në këtë mision.

Në prag të përfundimit të mandatit, Dumani ka shprehur një shqetësim të veçantë që lidhet me të ardhmen e strukturës, veçanërisht në rastet kur një numër i konsiderueshëm prokurorësh mund të largohen njëkohësisht. Ai i ka bërë thirrje ligjvënësve që të parashikojnë situata të tilla, duke u kujdesur për qëndrueshmërinë dhe funksionimin normal të SPAK.

“Ajo që SPAK ka arritur ato rezultate modeste për të konsideruar sukses duhet të presim, janë produkt i prokurorëve të posaçëm të hetuesve të BKH dhe hetuesve financiare të cilët i kanë dedikuar këtë profesionin jetën e tyre. Kam pasur fatin si drejtues të punoj me kolegët prokurorët një bashkëpunim shumë korrekt institucional dhe njerëzor. Unë jam thjesht drejtues, duke qenë drejtues vëmendja kanalizohet te unë.

Perspektivën e SPAK e shoh të mirën, është maturuar, qoftë nga pikëpamja profesionale por dhe integritetit vlerësoj se është në gjendje të përmirësohet duke ecur dhe perspektivën e shoh me shumë pozitivitet, Nuk shoh asnjë rrezik, ma merrni si merak , ai momenti kur 11 prokurorë ikin menjëherë, duhet të mendoni si ligjvënës. Sa i takon delegimit që unë kam bërë për prokurorë që të ndihen të pavarur, delegim është me urdhër të drejtues, pasardhësi ka në kompetencë të ndryshojë urdhrin”, tha Dumani.