Tirana zbret në Ersekë, rruga qëndrore merr emrin “Artan Lame”! Miqtë e bashkëpunëtorët: U kthye në vendin e tij duke na lënë pengun e mungesës (CEREMONIA)
Ka qenë vendlindja e tij dhe pavarësisht siç thotë e ëma Diana Lame, ai lindi në Tiranë por rrënjët i kishte te kolonjarët. Ishte momenti i krenarisë së tij të përhershme. Ndoshta për këtë arsye, pas vdekjes së tij, Këshilli Bashkiak i Ersekës vendosi që një prej rrugëve në qendër të qytetit të mbajë emrin “Artan Lame”.
Ditën e sotme në qendër te Ersekës, pushtetarë vendorë, miq e familjarë u mblodhën për nder të kujtimit të Artan Lames. Kishin ardhur të gjithë miqtë e tij, Artan shkreli, Auron Tare, Daniel Gjoni, Artan Dumi, biznesmeni Arjan Leskaj si dhe miku i ngushtë Florend Kalivopuli.
Nga Korça erdhi Niko Kotherja prej kohësh drejtor për trashëgiminë. Ndërsa shoqata e koleksionuesve ishte një vlerë e shtuar e këtij aktiviteti. Nuk mungonte aty Bajram Peçi e Julian Demeri, as shoqet e tij Julinda Dhame e Anila Basha.
Erseka, nuk kishte parë asnjëherë më parë kaq shumë njerëz bashkë. Aq sa sheshi i vogël në rrugën që do të mbajë që sot e tutje emrin e tij, u kthye në një qendër mitingu, ku veç gjithë këtyre personaliteteve e njerëzve të njohur që erdhën nga Tirana, nuk munguan ata për të cilët ai foli gjithmonë shumë kudo ku ishte: Qytetarët e Ersekës e madje, shumë syresh kishin zbritur bash nga fshati Qytezë.
Nuk mund të ishte ndryshe festa në kujtim të emrit të mirë dhe të madh që la Artan Lame. Ndaj ceremonia modeste u mbush plot emocion kur nëna e tij Diana Lame dhe bashkëshortja Mirela Lame zbuluan tabelën me emrin e Artan Lames.
“Do na duket çudi që se kemi mes nesh, por edhe krenari që kemi këtë emër në letrat, zarfat, kërkesat e emrave në rrugë, kur të shohim aty të shkruar “Artan Lame”.”-tha Niko Kotherja, një mik i kahershem i Lames dhe Drejtor i Trashëgimisë.
Koleksionisti Bajram Peçi, u shpreh në këtë aktivitet se kontributi i Artan Lames është i shquar ndërsa shtoi se me ndihmën e tij kanë arritur gjëra të cilat nuk do t’i arrinin kurrë. Peçi vuri theksin tek bashkëpunimi i gjatë ndër vite me Artan Lamen.
“Kemi bërë gjëra që pa ndihmën e Artan Lames nuk do t’i arrinim kurrë. Artan Lame dha një kontribut të shquar. Për një kohë të gjatë kemi bashkëpunuar me të ndjerin Artan Lame për publicistikën e tij. Unë si punonjës i vjetër i organeve të shtypit e vlerësoj pafund. Kemi patur bashkëpunime të gjata.“-tha Peçi.
Ndërsa publicisti Auron Tare gjatë fjalës së tij u shpreh se Artan Lamen nuk do ta kujtojnë vetëm të afërmit, miqtë e shokët, por i gjithë qyteti.
“Artan Lamen do ta kujtojmë jo vetëm ne si shokët e tij të ngushtë por edhe ky qytet.”-u shpreh Tare.
