Futbolli shqiptar në krizë totale, FSHF kërkesë qeverisë: Klubet dhe akademitë drejt falimentimit, të përfshihen në paketën e kompensimit

Situata e krijuar nga pandemia e COVID-19 në Shqipëri, ka sjellë një krizë totale në futbollin shqiptar, duke filluar nga akademitë dhe deri të klubet me financat më të forta në Shqipëri.
Duke marrë shkas nga kjo gjendje, Federata Shqiptare e Futbollit ka vendosur që t’i dërgojë një kërkesë qeverisë, për të përfshirë në paketën e kompensimit të gjithë punonjësit e sektorit të futbollit në vend, për të siguruar mbijetesën e familjeve të tyre.

Në kërkesën drejtuar qeverisë, FSHF thekson se kjo gjendje po i çon klubet e futbollit drejt falimentimit, pasi nuk kanë asnjë të ardhur nga biletat dhe të drejtat televizive, por problem është edhe tërheqja e sponsorave, pasi në këto kohë që futbolli është ndalur, asnjë biznes nuk ka interes të investojë në reklama.

“Federata Shqiptare e Futbollit i ka dërguar një letër Këshillit të Ministrave dhe i ka kërkuar garantimin e anës financiare për të gjithë komunitetin e futbollit në Shqipëri, përmes një pakete kompensimi. FSHF iu përgjigj në mënyrë të menjëhershme urdhërit nr. 132 të Ministrisë së Shëndetësisë dhe Mbrojtjes Sociale më datë 08.03.2020 duke pezulluar të gjitha aktivitetet futbollistike në vend, si dhe u kërkoi klubeve të marrin masa për mbrojtjen e shëndetit të futbollistëve dhe stafeve teknike. Njëherazi Vendimi nr.243 i Këshillit të Ministrave i datës 24.03.2020 për Shpalljen e Gjendjes së Fatkeqësisë Natyrore, ka ndaluar tërësisht punën e Federatës së Futbollit dhe të gjitha hallkave të këtij sektori në rang vendi.

Kjo situatë, ka paralizuar punën e klubeve, shkollave dhe akademive të futbollit duke i çuar ato drejt falimentit, duke lënë pa asnjë të ardhur mijëra të punësuar duke nisur nga futbollistët, trainerët dhe deri të stafet teknike. Klubet janë në pamundësi për të bërë pagesa, për shkak të ndërprerjes së të gjitha të ardhurave nga biletat, transmetimet televizive si dhe për shkak të tërheqjes së sponsorave.

Nisur nga kjo situatë, Federata e Futbollit kërkon që të gjithë punonjësit e përfshirë në sektorin e futbollit në vend, të përfshihen patjetër në paketën e kompensimit, si një e drejtë themelore për të garantuar mbijetesën e familjeve të tyre në këtë kohë të vështirë.

Federata e Futbollit i është bashkuar mesazhit të qeverisë në thirrjen ndaj qytetarëve për të qëndruar në shtëpi dhe duke ruajtur shëndetin e gjithësecilit. Këto mesazhe janë pjesë e një projekti kombëtar të FSHF për të kthyer vëmendjen ndaj fëmijëve tanë dhe për ta parë futbollin si një mjet argëtimi dhe përkujdesjeje për ta. Njëherazi, FSHF i është bashkuar fushatës së FIFA-s dhe Organizatës Botërore të Shëndetësisë në luftë kundër virusit COVID-19, duke e përcjellë këtë fushatë në të gjitha hallkat e botës futbollistike shqiptare”, shkruhet në njoftimin e FSHF.