Protestë për Valbonën/ Shoqëria civile: Gjendja është alarmante

Marshimi nisi nga Monumenti i Pavarësisë në Parkun Rinia për të vazhduar më pas me një marshim paqësor për të ndërgjegjësuar shqiptarët rreth rrezikut që i kanoset Valbonës e parqeve të tjera kombëtare.Tubimi i rradhës vjen pas vendimit të Gjykatës Administrative të datës 3 nëntor, e cila lejoi ndërtimin e tre HEC-ve përgjatë lumit me të njëjtin emër. Aktivistët shprehen se punimet për HEC-et po çojnë drejt shkatërrimit një prej resureve natyrore më të çmuara të vendin ku çdo vit mbledh mijëra turistë të huaj. “VNM (Vlerësimi i ndikimit në mjedis) është i pavlefshëm sepse është dhënë në korrik të vitit 2013 dhe mbas dy vjetësh nuk vlen më, duhet bërë një e re. Në dijeninë time ata nuk kanë bërë një VNM të re, aq më tepër që ka plagjiatura pafund. HEC-et nuk sjellin asnjë përfitim për banorët e zonës.Pas përfundimit të HEC-eve, do të nevojitet vetëm 1ose 2 roje për funksionimin e HEC-eve. Pra nuk krijohet asnjë vend pune, përveç përfitime për persona të caktuar që as nuk banojnë fare në atë luginë.” ,- është shprehur aktivisti shoqërisë civile Ervin Goci, dhe njëkohësisht pedagog në Universitetin e Tiranës. Sipas aktivistëve HEC-et e legjitimuara nga qeveria dhe gjykatat, po sjellin edhe konflikte sociale.“Kemi 34 të arrestuar për shkak të konflikteve, një të vrarë dhe një tentativë për vrasje”, janë shprehur ata.Sipas shoqërisë civile dhe aktivistëve marshimet e protestat do të vazhdojnë periodikisht çdo të diel në orën 12:00 në Tiranë e qytete të tjera në Republikën e Shqipërisë e botë, ku jetojnë shqiptarë, deri në ndalimin e shkatërrimi të Valbonës.