Tensionet pas vrasjes së “El Mencho”, Trump i bën thirrje Meksikës: Të shtohen përpjekjet kundër karteleve të drogës

Donald Trump i ka bërë thirrje sot Meksikës që të shtojë përpjekjet kundër karteleve të drogës, ndërsa dhuna është përshkallëzuar në disa zona të vendit fqinj jugor të Shteteve të Bashkuara. Thirrja e tij erdhi një ditë pasi një bastisje ushtarake vrau një bos famëkeq meksikan të drogës.

“Meksika duhet të shtojë përpjekjet e saj kundër karteleve dhe drogës!”, shkroi ai në një postim në rrjetet sociale.

Sipas raportimeve, drejtuesi më i kërkuar i kartelit në Meksikë dhe kreu i Kartelit të Gjeneratës së Re të Jaliscos, Nemesio “El Mencho” Oseguera Cervantes, u vra së bashku me tetë anëtarë të tjerë të kartelit në një operacion ushtarak meksikan të ndihmuar nga mbështetja e inteligjencës amerikane. Ku 25 anëtarë të Gardës Kombëtare të vendit vdiqën gjatë sulmeve në shtetin e Jaliscos.

Vrasja shkaktoi trazira të përhapura, me anëtarë të dyshuar të bandave që dogjën autobusë dhe biznese ndërsa u përleshën me forcat e sigurisë. Presidentja meksikane Claudia Sheinbaum tha se “paqja, siguria dhe normaliteti” po ruhen në të gjithë vendin.

Departamenti Amerikan i Shtetit u bëri thirrje shtetasve amerikanë në disa pjesë të Meksikës që të  “kërkojnë strehim dhe të qëndrojnë në rezidenca ose hotele” deri në përmirësimin e situatës së sigurisë.