FOTO/ Kali i djegur në Delvinë, veterinerët e Vlorës dhe klinika private nga Tirana e marrin për ta mjekuar
Një klinikë private nga Tirana ka marrë përsipër mjekimin dhe kurimin e një kali të djegur nga zjarret në Delvinë, pas pamjeve që u shpërndanë me shpejtësi pasditen e djeshme në mediat sociale dhe ngjallën reagime të shumta, për shkak të gjendjes së rënduar të kafshës.
Kali ishte djegur pothuajse në të gjithë sipërfaqen e trupit, por fatmirësisht ishte ende në jetë dhe kishte zbritur në rrugët e fshatit për të gjetur ujë.
Imazhet u kapën nga fotoreporterët që ndodheshin në terren në Delvinë dhe u përhapën me shpejtësi, edhe si një apel për qytetarët që kishin mundësi që ta merrnin për ta mjekuar. Klinika private “Tier Life Tirana” ka marrë përsipër mjekimin.
Gazetari dhe aktivisti për mbrojtjen e kafshëve, Endri Goxhaj thotë se veterinerët e Autoritetit Kombëtar të Veterinarisë në Vlorë i kanë dhënë ndihmën e parë kafshës së plagosur dhe në orët e vona të mbrëmjes kali është nisur drejt Tiranës.
“Kalin e djegur nga zjarret ne Delvine sapo e morëm. Tani jemi në udhëtim drejt @tierlife_tirana – na uroni që gjithçka të shkojë sa më mirë. Faleminderit gjithë veterinerëve të AKVMB Vlorë per bashkëpunimin. Bashkë bëjmë shumë. Do t’ju mbajmë të përditësuar”, shkruan Endri.
Fatkeqësisht, nga shtrirja e madhe e zjarreve në disa zona të vendit dhe përhapja e flakëve në fshatra, ka shkaktuar shumë dëme në tufat e bagëtive dhe kafshët e tjera që banorët i mbanin pranë shtëpive. Siç ka njoftuar Ministria e Bujqësisë, pritet që të bëhet një inventarizim i humbjeve dhe banorët e prekur të dëmshpërblehen.
© Newsbomb.al
Kali i djegur ne Delvine/ © LSA PHOTO