Për herë të parë në Ballkanin Perëndimor, Tirana do të presë Ministerialin e Mbrojtjes të NATO-s

Për herë të parë, një ministerial i mbrojtjessë NATO-s do të organizohet në Ballkanin Perëndimor, e më konkretisht në Tiranë.

Takimet e kësaj strukture janë zhvilluar vetëm në Belgjikë, por NATO i beson vendit tonë organizimin e tij, duke vlerësuar kështu rolin që vendi ynë ka si faktor stabiliteti në rajon.

Ministrat e Mbrojtjes të vendeve anëtare të NATO-s miratuan në mbledhjen e Këshillit të Atlantikut në Bruksel propozimin e ministres së Mbrojtjes, Olta Xhaçka, që Ministeriali i Mbrojtjes, në qershor të këtij viti të mbahet në Tiranë.

“Vendimi i Aleancës për tu takuar në Shqipëri është jo vetëm vlerësim maksimal për sigurinë që vendi ynë përcjell si një aleat i denjë, por edhe një mesazh i fortë i NATO për vëmendjen e saj ndaj Ballkanit Perëndimor e rolit të fortë që Shqipëria luan si faktor stabiliteti në rajon”, tha ministrja në përfundim të Ministerialit të Mbrojtjes, mbajtur në Bruksel në 12 dhe 13 Shkurt.