Ekspozohen krimet e serbëve në Podojuvë, Dacic i pranishëm, protestohet (FOTO)

BOGUJEVCI-Ekspozita, e cila ka të bëjë me krimet që kanë kryer forcat serbe ndaj familjes Bogujevci, më 1999 në Podujevë, është hapur të mërkurën mbrëma në Qendrën për Kulturë të Beogradit.

Ndërkohë, policia ka mënjanuar rreth 50 persona që kanë protestuar para galerisë, ndërsa në ekspozitë ka qenë i pranishëm edhe kryeministri i Serbisë, Ivica Daçic, si dhe njerëz të tjerë nga jeta publike dhe politike e Serbisë.

E titulluar “Bogujevci – historia vizuale, homazh për të gjitha familjet dhe viktimat e luftës”, ekspozita është vepër e Fatos, Jehona dhe Saranda Bogujevcit, të cilët si fëmijë kanë mbijetuar masakrën.

Në një fjalim të shkurtër për të pranishmit, Saranda ka shfaqur shpresën se publiku beogradas do ta vizitojë ekspozitën.

Krimet

“Për ne është shumë e rëndësishme që jemi këtu. Kemi ndjenjën se e kemi pasur të shkruar të mbijetojmë për të treguar historinë tonë, për të treguar të vërtetën. Shpresoj se njerëzit do të vijnë për ta parë ekspozitën”, ka thënë Saranda.
Edhe pse projekti i është dedikuar një krimi të caktuar, kryeministri serb, Daçic, ka këmbëngulur në krimet e kryera nga të gjitha palët.

“Do të doja të dënohen të gjithë ata që kanë kryer krime ndaj popullatës civile në luftërat në ish-Jugosllavi. Në anën tjetër, uroj që e vërteta të mund të tregohet kështu në të gjitha pikat e ish-Jugosllavisë: edhe në Zagreb, edhe në Knin, edhe në Sarajevë, edhe në Banjallukë, edhe në Prishtinë”, ka thënë Daçic para gazetarëve.

Prania e Daçicit në ekspozitë është një gjest i rëndësishëm, por ndryshimi i shoqërisë serbe nuk mund të bëhet vetëm me disa veprime protokollare, ka thënë për Radion Evropa e Lirë Ҫedomir Jovanovic, kryetar i Partisë Liberal-Demokrate të Serbisë, i cili po ashtu ka qenë i pranishëm në hapjen e ekspozitës.

“Shpresoj se ardhja e tij këtu do të iniciojë procesin, për të cilin Serbia ka nevojë. Ne jemi distancuar nga vitet ’90, por nuk kemi ndryshuar shumë”, është shprehur Jovanovic.

Mia David, drejtore e Qendrës për Kulturë të Beogradit, ka thënë se është shumë e rëndësishme që një ekspozitë e tillë është hapur në një institucion publik të qytetit.

Protesta

“Ky është fillimi i dialogut, fillimi zyrtar i një kapitulli krejtësisht të ri në marrëdhëniet e pasluftës. Për mua është kënaqësi e veçantë që Qendra për Kulturë e Beogradit është institucioni ku kjo po ndodh”, ka thënë David.

Ekspozita “Bogujevci – historia vizuale, homazh për të gjitha familjet dhe viktimat e luftës” është hapur me gjithë reagimet e stuhishme të një pjese të publikut dhe të mediave në Beograd, që e kanë karakterizuar atë si “propagandë shqiptare”.

Më 28 mars të vitit 1999 në Podujevë, pjesëtarë serbë të formacionit “Skorpionët” kanë vrarë 14 persona, në mesin e tyre gra dhe fëmijë. Pesë fëmijë të plagosur rëndë kanë mbijetuar, në mesin e tyre edhe Saranda, Jehona dhe Fatosi.

loading...

Leave a Reply

Your email address will not be published. Required fields are marked *

Back to top button
Close